Husu kona-ba bainhira mak halo nomeasaun ba Prezidente autoridade RAEOA mak Xefe Governu hateten, horsehik mak membru governu sira halo fali servisu ne'ebé informa ona ba Xefe Estadu katak iha tempu badak.
"Loos duni, horsehik mak ita bele tama fali servisu ne'ebé ha'u mós informa ona ba Prezidente Repúblika katak iha tempu ne'ebé badak sei la'o," dehan PM Xanana, iha Palásiu Prezidensiál Bairru-Pite, horisehik.
Molok ne'e, Primeiru Ministru, Kay Rala Xanana Gusmão, liu husi despaxu númeru 014/PM/XII/2023, formaliza, iha loron 01 fulan dezembru tinan 2023, ba kriasaun Komisaun atu halo tranzisaun ba mandatu husi membru sira Autoridade Rejiaun Administrativa Espesiál Oekusse Ambeno (RAEOA).
Inisiativa ne’e husi alterasaun ba lejizlativa sira foin lalais, ne’ebé prevee iha Lei númeru 18/2023, loron 30 fulan Novembru, ne’ebé determina automatikamente husi termina mandatu ba membru sira husi Autoridade nian, inklui Prezidente Autoridade Arsénio Bano.
Komisaun ne’e kria atu asegura tranzisaun ida ordenada ba mandatu sira iha RAEOA, bainhira halo pontu situasaun ba administrativa no finanseira Rejiaun nian, molok hahú prosesu dezignasaun ba ninia membru foun sira.
Komisaun ne’e ninia misaun atu simu, reprezentasaun husi Primeiru-Ministru, relatóriu husi mandatu membru sesante atuál sira RAEOA nian, nune’e mos atu elabora relatóriu ida, ho prazu ba loron 15 nia laran, atu halo pontu situasaun no avalia atividade administrativa no finanseira ne’ebé dezenvolve ona husi Autoridade RAEOA nian, ne’ebé inklui, entre sira-seluk, karaterizasaun ba rekursu umanus, inventariasaun ba beins movel no imovel nian sira, identifikasaun ba obrigasaun kontratuál, kompromisu sira seluk ne’ebé asume ona, no ba finanseiru pasivu. Ho konkluzaun ba tarefa ida ne’e, Komisaun ne’e sei estinta (disolve).
Komisaun ne’e sei koordena husi Sebastião José Luís dos Santos Pereira no sei kompostu mós husi Dulce Guterres Júnior, Agostinho Caet, Francisco da Costa Soares “Borlaku”, Bendito Escorial Fernandes, Januário Maia Guterres no Ricardo Alves Delgado.
Komisaun sei konta ho kolaborasaun husi órgaun no servisu sira RAEOA nian, ne’ebé sei fornese dokumentu no informasaun nesesáriu sira no Unidade Apoia Jurídiku husi Prezidénsia Konsellu Ministrus ne’ebé sei fó asesoria jurídika.
Alterasaun sira ne’ebé promove ona husi Lei númeru 18/2023, loron 30 fulan Novembru, kona-ba estatutu RAEOA nian, orienta liuhusi kritériu ekonomia, efikásia no efisiénsia, ho objetivu ba territóriu instrumentu legál krusiál sira hodi fomenta dezenvolvimentu ekonómiku enklave nian no ninia populasaun nia moris di’ak.
