"Hafoin Ministeriu Publiku halo tiha promosaun mai TDD ba ha’u nia kliente Longuinhos Monteiro depois tribunal estuda tiha detensaun apreensaun no buska ne’ebé ita nia autoridade polisia halo ba ha’u nia kliente ne’e la tuir lei ka ilegal, entaun TDD deside liberta total ha’u nia kliente ba krimi arma proivida previstu iha artigu 211 husi kodigu penal Timor-Leste alerta iha lei numeru 5/2017,” dehan Defensór Públiku, Fernando Lopes de Carvalho, iha TDD, kuarta (18/01).
Enkuantu, tuir loloos iha loron (18/01) arguidu ne’e, tenke submete bá prosesu primeiru interrogatóriu judisiál iha TDD, maibé depois haree bá fali promosaun sira hosi Ministériu Públiku (MP) hodi imputa krime Arma Ilegál, Tribunál estuda katak esforsu sira ne’ebé durante PCIC halo ne’e illegál.
Nia haktuir, promosaun husi MP hato'o ba tribunal maka haree legalidade ba kapturasaun no buskas no aprensaun husi PCIC se tribunal konsidera ilegal, entaun promosaun mai tribuna la simu.
Tanba ne'e, nia dehan, prosesu ne’ebé sira halo buska, apresaun no kapturasaun, ne’e PCIC mak halo ka autoridade balun mak halo, ne’e Tribunál rekoñese la tuir formalizmu legál ne’ebé prevee iha kódigu prosesu penál.
“Laiha mandadu, depois iha lei hateten katak, buskas, apresaun ne’e tenke bazeia bá mandadu Tribunál nian, depois halo iha tuku 6:00 dadeer to’o tuku 6:00 lokraik. Labele halo iha kalan boot, ne’e lei proibidu. Iha formalizmu sira hanesan ne’e, ita nia autoridade sira la haree, entaun ninia konsekuénsia mak ida ne’e, ita hotu la’o tuir Lei,” nia esplika.
Ministériu Públiku liu husi Prokuradór Jacinto Babo, promove arguidu Longuinhos Monteiro ho krime armas ilegáis, maibé Tribunál mak haree legalidade bá iha kapturasaun, bá buska no apresaun.
“Sé Tribunál rekoñese dehan ilegál, entaun promosaun mai Tribunál la simu. Tanba ne’e maka ohin Tribunál deside katak, liberta totál arguidu,” nia dehan.
Enkuantu, hatan kona-bá oinsá ho arma sira ne’ebé PCIC preende ona, defeza husi arguidu ne'e dehan nia sei lee lai despaixu sira ne’e, tanba iha kedan folla 10. Maibé, klaru katak desizaun sira husi Tribunál ne’e iha mós finalidade bá objetu hirak ne’e.
“Ha’u lee lai despaixu ne’e, normalmente despaixu sira hanesan ne’e fim bá objetu apreensoins, mós iha despaixu laran hateten deit liberta", nia informa.
Entretantu, iha audiensia Julgamentu ne'e, prezide husi Juiz Turnu, Argentino Nunes, Ministeriu Públiku (MP), reprezenta husi Prokurador Jacinto Babo, no Defendor Públiku, Fernando Lopes de Carvalho.
Iha buska ne’e, ekipa konsege prende sasan funu nian hanesan Pistola Lot-9789 Made by Germany, ida; Kilat Air Force, Made in US Model R-1212, ida; Kilat Marauder 177-Cal/4.5mm 2500 Psi, ida; Kilat Sam Yang ind.CO,.Made in Korea, Golden Sayer air rifle Mud 700.cal.4,55mm, ida; no Kilat Rama, Horton Special edtion, Made in US, B59748, ida.
Ekipa mós prende kilat-musan rihun rua resin, hanesan munisaun Real M16 iha 305, munisaun Kaliber-12 iha 2, munisaun Pistola Glock 19 iha 1.498, munisaun Simulada M16 iha 178, munisaun SP, GLM, J3 (Kahur Malu) iha 218, munisaun Kilat Vinte Dois (22) iha 12, Broning Roo iha 3, Rama Oan Red Zone 2219 iha 22, no Bomba Kilat iha 3.
Aleinde ne’e, prende mós karegador no asesories ba arma hirak ne’e, hanesan karegador J3 iha 3 no Karegador Pistola Lot – 9789 iha 4, no mós GPS Map - 60csx Garmin iha 1, Cas Batria iha 1, Maka Militar iha 2, Lampu Solar iha 2, Jacket Militar iha 2, Peredam Suara iha 2, Mala Bala iha 2, Tali Cas GPS iha 1, Pasta Metan Ki'ik iha 1, no Pasta Kilat iha 3.
