Ministru Administrasaun Estatal, Miguel Pereira de Carvalho hetete, haree ba problema lixu ne’ebé kontinua aumenta, governu mós iha hanoin ida hodi aprova projetu melloramentu jestaun lixu hodi tau kontentor iha capital Dili nune’e populasaun sira bele soe lixu iha kontentor refere.

“Ohin loron Dili populasaun kontinua aumenta no produs lixu mós nia kuantidade boot,”dehan nia ba Jornalista sira iha Palasiu Governu, kuarta (18/01).

Governante ne’e dehan, ho kuantidade lixu ne’ebé aumenta, kada loron populasaun sira produs lixu to’o toneladas hamutuk 230.

Tanba ne'e, MAE husu ba AMD nafatin fó avizu ba populasaun sira atu soe fo’er tuir nia fatin no tuir órariu ne'ebé fó sai ona katak, soe lixu iha dader tuku 5:00 to’o 7:00 oras TL.

Nia dehan, lixu ne'ebé namkari iha fatin-fatin ne'e, tanba komunidade balun soe lixu iha fali oras meudia tuku 12:00 no tuku 1:00, ho ida ne'e mak lixu nafatin namkari iha sidade Dili.

Nia akresenta, iha tinan 2020 to’o 2022 Autoridade Munisipiu Dili aluga ona kamioneta hamutuk besik 80 hodi tula fo'er sira.

Ho nune’e, kamioneta sira ne’ebé tula lixu ba fakar iha Tibar kada loron sira tula dala tolu.

Entretantu, molok ne’e Deputadu sira iha Parlamentu Nasional mós preokupa kona ba lixu ne’e bé kontinua namkari iha sidade Dili.

Tuir Prezidente Bankada Partidu Demokrátiku, António da Conceicao hateten, lixu ne’e governu presiza iha politika ida loloos kona-ba rekolla lixu ne’e.

“Governu anterior ko’alia kona-ba Portugal atu ajuda oin nusa mak atu halo tratamentu lixu, agora ita ko’alia fila-fali kompana sira boot-boot balun mai halo promesa tinan-sanolu ona, kuandu ita temi beibeik Pelican Paradise, hau hanesan alerjiku oituan, tanba asume promesa depois fo nafatin empena ita Timor nia prosesu dezenvolvimentu atraza, tanba promesa ne’ebe iha,” dehan nia, iha Parlamentu Nasionál, horisehik.

 Iha fatin hanesan, Prezidente Bankada Frente Mudansa, Isabel Ximenes, preokupa lixu iha komoro nian ne’e loroloro lixu nakonu tebetebes.

“Kuandu mais ida agora ne’e merkadu urjente iha komoro ne’e, lor-loron nakonu teb-tebes,  depois sira fahe malu iha tuku 9:00 kalan, lixu  nakonu iha area ne’ebá liu-liu, parte ida ne’ebé mak iha sentru saúde Komoro nia oin kedan,” nia kestiona.