Ministru Administrasaun Estatal, Miguel Pereira de Carvalho, hatete, maske mandatu oitavu governu nian besik atu remata ona maibe, sira sei trata lai reklmante sira ne'ebé seidauk hetan sira nia direitu ba subsidiu $200 nian.

Tanba ne’e, MAE husu ba prezidenti autoriedade, administrador sira atu haruka dadus ba Ministeriu atu nune'e sira haruka ba MSSI hodi haree.

“Mandatu governu da-ualu hela deit fulan haat, maibé governu prontu atu resolve, tanba Primeiru Ministru fó ona instrusaun atu haree mós assuntu ne'e. Tanba governu iha atu tau matan ba nia povu sira, no governu iha inisiativa atu fó solusaun, karik governu ida ne'e la rezolve, governu tuir mai bele resolve,”dehan nia iha Palasiu Governu, kuarta ne’e (18/01).

Governante ne’e hatutan, governu kompremitidu atu fó solusaun ba reklamante sira.

Nia haktuir, ba reklamante sira, dadauk ne’e iha hela prosesu nia laran, no gevernu esforsu hela atu resolve.

Entretantu, molok ne’e Vise Primeira Ministra no Ministra Solidariedade Sosial no Inkluzaun, Armanda Berta dos Santos hatete, pagamentu ba subsidiu $200 finaliza ona iha 6 Janeiru 2023.

Tuir dadus ne’ebé MSSI iha, nia hatutan, iha uma-kain rihun 28 resin ne’ebé reklama tanba sira-nia naran laiha iha lista pagamentu subsidiu $200.

"Iha dekretu lei ne'e laiha reklamante, ne'ebé ko'alia ona ho Primeiru Ministru oinsa par atu bele haree fali ida ne'e, atu rezolve fali ba sira ne'ebé reklamante, se iha dalan atu rezolve ita bele halo, se laiha, ita pasiensia," dehan nia hafoin hasoru PM Taur, iha Palásiu Governu, Tersa (10/01).