Vise Ministru Finansas (V-MF) António Freitas hatete, nia parte mai reuniaun semanal ho primeiru Ministru atualiza pontu importante ligadu ho orsamentu jeral Estatua 2023, hanesan hatene OJE 2023 hetan promulgasaun husi prezidente Repúblika iha loron 20 fulan Dezembru 2022, iha loron 5 fulan Janeiru distribui ona orsamentu ne'e ba liña Ministeriu.
"Hahú loron 5 fulan Janeiru 2023 orsamentu iha ona sistema ezekusaun la'o ona, Totál ezekusaun orsamentu tinan ne'e to'o ohin ho montante purvolta rihun 364.222, ida ne'e seidauk inklui salariu fulan ida ne'e nian, salariu hanesan ita boot sira hatene 20 ba leten mak halo pagamentu, ezekusaun orsamentu tinan ne'e la'o ona, ida ne'e mai ha'u relata Primeiru Ministru," dehan nia hafoin hasoru Primeiru Ministru iha Palásiu Governu, Tersa (17/01).
Nia detaillu dahuluk ezekusaun ne'ebé mak hato'o ne'e eszukusaun primeiru husi gabinete Prezidensiá Repúblika nian Purvolta 250 mill, depois iha mós proposta balu mai husi Servisu Nasionál Intelijensia (SNI) rihun 29.200 no mós ho Institutu Defeza Nasionál (IDN).
"Hirak ne'e mak hahú ona halo ezekusaun ne'ebé mak ami jerista ona," tenik nia.
Komunikadu ne'ebé Mídia Independente asesu loron hirak liu ba, Governu liu husi Ministeriu Finansas (MF) halo ona abertura hodi hahú ona ezekusaun ba orsamentu jeral estadu tinan fuskal 2023 nian.
Molok ne'e iha loron 5 Janeiru 2023 Ministru Finansas, Rui Gomes halo abertura ofisiál ba sistema Government Resource Planning (GRP) ka Free Balance hodi marka inísiu ezekusaun OJE 2023 ne’ebé mak hetan ona promulgasaun husi Prezidente Repúblika, José Ramos-Horta iha 21 Dezembru 2022.
Antes halo abertura ofisiál ba sistema GRP, Ministru Finansas Rui Gomes mós simbolikamente Entrega Pakote OJE 2023 ba representantes Gabinete da Presidênsia da República, Gabinete do Presidente Parlamento Nacional, Gabinete do Primeiro-Ministro, Gabinete Presidente do Tribunal de Rekursos nomós ba Liñas Ministeriais.
Sesaun Traballu ne’e realiza iha Auditóriu Ministériu Finansas no organiza husi Diresaun Jerál Planeamentu no Orsamentu, Ministériu Finansas.
“Ita foin husik tinan 2022, tinan ida ke nakonu ho traballu intenso. Susesu lubun ida ke Ita alkansa ona, estraordináriu tebes, ne’e hatudu rezultadu husi Reforma Fiskál no Jestaun Finanseira Públikas,” dehan Komunikadu ne'ebé midia Asesu iha gabinete MF, Sesta (06/01).
Hahú ho promulgasaun Lei Enkuadramentu Orsamentál husi Prezidente da Repúblika sesante tuir kedan ho promulgasaun Lei das Grandes Opsoens Planu ba 2023 husi atuál Prezidente da República, José Ramos-Horta. Ho promulgasaun Leis estruturantes ne’e, hamutuk ho Diploma sira ke regulamenta hodi fasilita ezekusaun orsamentál 2023 hanesan Dekretu Governu kona-ba Programas Orsamentais no Dekretu Governu kona-ba Klassificadores Orsamentais, hatudu katak Presidentes da Repúblika komprende importansia husi Reforma Fiskál no Jestaun Finanseira Públikas.
Ministru Rui Gomes mós hateten konkista importante ida ne’ebé mak Governu alkansa iha tinan 2022 mak ezekusaun reál OJE 2022 emtermos nominais atinji $1,743 billoens valór ida ne’ebé pela primeira vez aas liu iha istória Timor-Leste desde país ida-neé restaura nia Independénsia no konsege ultrapassa ezekusaun reál OJE 2016 iha ne’ebé Governu konsege ezekuta $1,630 billoens.
Ho ezekusaun reál OJE 2022 ne’ebé fenomenal sa’e 7% kompara ho ezekusaun reál OJE 2016 hatudu katak kapasidade ezekusaun orsamentál iha liñas ministeriais mós aumenta. Atu mantein ritmu no kapasidade ezekusaun ida-ne’e presiza investimentu kontínuu iha área rekursus umanu, iha sistemas inklui iha enkuadramentu legal sira.
Sesaun Traballu ne’e hetan partisipasaun husi Diretór Ezekutivu Ajensia Nasionál Planeamentu, Monitorizasaun no Avaliasaun (ANAPMA), Ageu Jorge Cardoso, Representantes Gabinete da Presidênsia da Repúblika, Gabinete do Presidente Parlamento Nasional, Gabinete do Primeiru Ministru, Gabinete Presidente Tribunal de Rekursos, Diretores Jerais, Responsaveis Órgaun no Servisos Fundo Autónoma, Diretores-Nasionais inklui Assesores no Tékniku Administrasaun no Finansas Públikas.
