Ne’e duni, Prezidente Taur enkoraja nafatin juis sira atu labele ta'uk ho karta aberta ne’ebé Xanana hakerek. Maibé, tenke brani hodi foti nafatin desizaun tuir lei haruka.

“Maun Xanana nia iha devér para ko’alia, mas setór justisa tenke hetan brani para halo serbisu. Tanba esperiénsia manan husi kombate, enkuantu mais ita atu ataka justisa, maibé setór justisa uza ninia devér no mekanizmu para atu hadi’a no afirma katak justisa loloos ne’e ida-idak responde ninian,” dehan nia, bainhira halo diálogu komunitaria ho Komunidade Suku Mascarenhas, Vera Cruz-Dili, Sábadu (4/2).

Tuir nia, intervensaun polítika ne’e la’ós legál. Karik iha pozisaun ruma, klaru que maun Xanana iha responsabilidade ba nia liafuan no justisa sei la naran-naran, tanba ne’e konstituisaun maka hatete.

Xefe Estadu ne’e rekoñese katak justisa iha Timor-Leste sei iha problema barak, tanba instituisaun nurak. Maibé ne’e papél Governu nian atu investe iha setór justisa.

Tau osan ba setór justisa, tanba jestaun orsamentu Timor nian ne’e Governu maka iha podér tomak no Governu maka fahe ba Prezidente Repúblika, Parlamentu Nasionál no setór justisa.

“Ita seidauk investe maka’as iha setór justisa no ha’u preokupa. Tanba ne’e, ha’u hanoin ita nia juis Timoroan sira iha intelijénsia (matenek) sufisiente para enfrenta difikuldade sira ne’e,” dehan nia.

Entretantu Antonino Pires, komunidade Aldeia 02, Suku Mascarenhas hateten, dehan observasaun ne’ebé durante ne’e sira iha justisa ninia lala’ok ne’e iha interferénsia balun ladún fó ámbitu atu haforsa justisa.

“Haree ba ohin loron iha asuntu justisa nian, ami hanoin katak partikularmente justisa iha ita nia rai, iha buat balu maka ami observa katak ninia lala'ok iha interferénsia balu maka ladún fó nia ámbitu ida ne’ebé bele haforsa ka hadi'a ita nia órgaun justisa atu bele la’o ba oin,” dehan Antonino.

Nia fó ezemplu, iha deklarasaun balun ne’ebé husi na’i ulun sira no mós ba patrimóniu Estadu hanesan hato’o ona iha liafuan balu ne’ebé haree katak iha konteúdu bele halo hanesan ladún dignifika ba órgaun sira liuliu kona-ba justisa nian.

Nia akresenta indireitamente sei proteje hela maluk ne’ebé komete hela iha erru balu. Tanba ne’e, ba oin karik asuntu ne’e presiza liu husi Estadu atu bele haree ho konsiderasaun didi'ak.

Relasiona ho ida ne’e, Antonino dehan, atu ko’alia klaru de’it katak, deklarasaun karta aberta ne’ebé Xanana hato’o sira akompaña liu husi média sira, ne’e sente la kontente.

Tanba karta aberta sira hanesan ne’e nusa maka labele kanaliza liu husi kanál sira ne’ebé Estadu deside ona, ho ninia prosedimentu para hotu-hotu atu bele proteje.