Liu husi pajina Palacio das Cinzas, deklara katak husi total suspeitu ne’ebé Komisaun Nasionál Covid-19 rejista, na’in 10 negativu, livre husi viruscorona (covid-19, no suspeitu na’in ida positivu, signifika katak hetan ona moras viruscorona.

Durante loron 14, Komisaun Nasionál Covid-19 konsege karantina ema hamutuk na’in 610, karantina iha uma 446, 149 passa ona karantina, no na’in 297 sei hetan akompaña husi ekipa mediku sira.

Ema sira hela iha karantina A no B, ne’ebé Governu prepara hamutuk 164. Ema hirak ne’e sei hetan akompañamentu husi ekipa mediku sira,

Tuir informasaun ne’ebé INDEPENDENTE online hetan katak suspeitu na’in ida hetan positivu, nia hela fatin agora iha sentru saude Vera Cruz.

Entretantu, Presidente Repúblika Fransisco Guterres (Lú Olo) husu ona autorizasaun ba Parlamentu Nasionál atu deklara Estadu Emerjénsia durante loron 30, relasiona ho ameasas covid-19 no identifikadu na’in ida mak positivu moras coronavirus.

Iha Parlamentu Nasionál, maioria deputadu vota kontra proposta Governu ne’ebé husu alterasaun ba Lei Orsamental no Jestaun Finanseira atu atende situasaun emerjénsia ne’e. Deputadu husi bankada CNRT, Partidu Demokratiku no KHUNTO vota kontra, no PLP ho FRETILIN afavor.