Tuir observasaun Jornalista INDEPENDENTE iha area Farol, sarani lubuk ida mak hahú forma iha dalan ninin.

Sarani ida, Maria Fernandes hateten, nia sente haksolok tebes tanba vizita Papa Francisco nian ne'e atu lori bensaun ba rai ne'e no ba sarani hotu.

"Ha'u ho ha'u-nia oan no familia sira seluk ohin dadersan tuku 8:00 mai hein iha ne'e. Ha'u sente kontente vizita Papa Francisco lori pas no bensaun ba rai doben no mos ba ami sarani sira hotu," dehan nia iha Farol, Segunda (09/09).

Maria dehan, nia ho nia familia forma iha ne’e atu bele haree besik Amu Papa.

"Ami hein iha dalan ninin ne'e tanba fatin di’ak atu bele haree direita no hetan bensaun direita husi Papa Francisco bainhira liu husi ne'e ba iha Nusiantura," dehan nia.

Iha fatin hanesan, peregrinu Julio Pereira hatete, hanesan sarani sente kontente Amu Papa Francisco mai Timor-Leste.

"Ha'u sente maske loro-manas ami prontu hein ho vontade tomak atu hein iha ne',e hodi simu Amu Papa Francisco," katak nia.

Tuir observasaun Jornalista Jornal INDEPENDENTE iha terenu nota katak, hahú dadesan to'o meudia ne'e sarani sira mai husi fatin-fatin konsentra hamutuk iha Farol dalan husi Microlete jalur 09 nian to'o iha edifisiu Ministériu Turismu no Ambiente nian.