Estudante husi Ensinu Báziku Filial Fatuhada, Manuel Amaral, kontente no antuziasmu hodi hein sua santidade Papa Francisco nia prezensa.
“Ha’u kontente no antuziasmu loos, tanba ne'e mak ha'u mai hein iha estrada. Ha'u foin primeira vez atu haree Papa nia oin direitamente, tanba ne'e orsida karik ami bele ka’er Papa nia liman, ha'u sei husu bensaun atu sai labarik ne'ebé matenek,” Dehan estudante, Manuel, iha Fatuhada segunda ne'e.
Fatin hanesan, Estudante Cristiano Sampaio hakarak simu bensaun husi Papa Francisco.
“Kontente loos hodi hein Papa ninia prezensa iha ne'e. Ha'u hakarak husu Papa atu fo bensaun mai ha'u atu sai labarik ne'ebé matenek no mós husu atu fo bensaun ba Timor-Leste,” Nia espresa.
Sekretáriu Estadu Ensinu Sekundária Jerál no Tékniku Vokasional, Domingos Lopes Lemos hateten, Ministériu Edukasaun orienta Edukasaun Munisípiu Dili, hodi organiza estudante sira forma iha estrada simu Sua Santidade Papa Francisco.
“Ba vizita sua santidade Papa Francisco ne'e ita fó orientasaun ba Diresaun Edukasaun Munisípiu Dili hodi organiza estudante hamriik ka’er bandarolas iha estrada ibun hahú husi eskola 30 Agostu mai kontinua Eskola Sekundáriu Jerál (ESJ) 10 Dezembru fatuhada, inklui eskola Annur no Farol,” Nia informa.
Nia hatutan, eskola sira ba parte Becora nia la hola parte, tanba transporte la movimentu ba mai, entaun eskola sira husi parte Vera Kruz no Nain feto inklui Dom Aleixo ne'e obrigatóriamente, tanba sira besik liu dalan portokolu.
Enkuantu, eskola sira ne'ebé sei hamrik iha dalan protukolu mak, Ensinu Báziku 30 de Agustu, Ensinu Sekundáriu Jerál (ESJ) 10 Dezembru inklui mós EBC, ESJ Finantil, Ensinu Báziku Filial Fatuhada, EBC Faról, no ESJ Annur.
