Responsável grupu Dadolin Ataúro, Cipriano Manuel hatete, dadolin ida ne'e reprezentante kultura Ataúro nian ne'ebé hakarak oferese ba Papa.
"Ami sei ho dadolin mak ‘Na'i hiit an mai ami-nia rai’ katak ami oferese ami-nia an ba Papa atu hasantu ami ho nia grasa nu'udar sarani katólika ne'ebé di'ak iha sosiedade no oinsá kolabora ho sarani husi reljiaun seluk nune'e bele hahi hanai no simu matak malirin," dehan Cipriano iha sira-nia fatin kolokadu iha dalan protokolu, Komoro, Segunda (09/09).
Hein katak ho prezensa Amu Papa iha Timor-Leste, bele loke sarani nia fuan atu kria pás no estabilidade nune'e bele lori dezenvolvimentu ba povu no rai ida ne'e.
“Ha'u sente onradu no kontente, vizita Papa nian bele lori matak malirin mai ami Ataúro-oan. Tanba ne'e ha'u-nia esperansa vizita Papa sei lori domin, dame mai ita ne'ebé durante ne'e ho vizinu, família, entre polítika mak la simu malu, liu husi Papa nia prezensa bele armónia liu tán ita-nia estabilidade hodi hakat ba dezenvolvimentu", dehan nia.
Entretantu, peregrinu Ataúro hamutuk na’in 1.044 mak daudauk ne’e hela iha Pelican Paradise. Husi númeru ne’e peregrinu na'in 150 mak reprezentante Atauro hodi simu Papa Francisco iha dalan portokolu.
