Sarani hahú forma iha dalan simu Amu Papa

Setembru 20, 2024

Sarani hahú forma iha dalan simu Amu Papa ^Featured

By Mariano Mendonca Setembru 09, 2024 384

Sarani sira hahú forma iha dalan protokolu hodi simu Amu Papa Francisco ne’ebé sei sama ain iha Timor-Leste iha oras balun tan, iha rotunda Nicolau Lobato, Komoro, Segunda (09/09). FOTO: INDEPENDENTE/Mariano Mendonça.

DILI: Sarani sira ne’ebé konsentra hamutuk iha kapital Dili hahú forma iha dalan ninin husi aeroportu to’o Farol hodi simu Amu Papa Francisco ne’ebé sei to’o iha Timor-Leste iha oras balun nia laran.

Tuir observasaun, sarani sira ne’ebé hatas faru ho imajen Amu Papa, kaer bandeira Vatikanu no RDTL hahú la'o ain no forma tuir estrada ninin.

Iha dalan protokolu sira autoridade seguransa Polisia Nasionál Timor-Leste, Falintil Forsa Defeza Timor-Leste (F-FDTL), eskuteiru, THS-THM, no Soldadu Kristu hahú taka dalan atu viatura labele tama iha estrada protokolu.

"Ha'u mai husi Parókia Hatulia, Munisipíu Ermera, ne'ebé mai husi dook mai iha ne'e tanba ha'u-nia obrigasaun hanesan Katólika no ha'u sente di'ak Papa mai atu lori buat ne'ebé di'ak, atu hametin ita-nia fiar," dehan sarani ida iha rotunda Nicolau Lobato, Segunda (09/09).

José hein katak ho prezensa Amu Papa sei lori pas no domin iha Timor-Leste.

"Ha'u nia esperansa katak Amu Papa mai atu lori domin no pas ba ita-nia rai doben ida ne'e, tanba ita hotu-hotu mai ho fiar ida katak Amu Papa sei lori grasa boot mai ita," katak nia.

Rate this item

(0 votes)

Last modified on Segunda, 09 Setembru 2024 13:55