Koordenadór Nasional ba Pastoral no Familia Konferensia Bispo Timorense, Madre Guilhermina Marçal hatete, loron finadu maka loron ne’ebé ema hotu hanoin hikas fali maluk no familia matebian sira ne'ebé maka fila hikas ona ba mundo seluk, liu husi kari ai-funan no sunu lilin mak nu'udar simbólu dame no domin.

“Loron ida ne'e, ita dehan katak, loron ida ne'ebé maka signifikativu ba sarani sira hotu, nu'udar sarani katoliku katak loron ida ne'e atu hanoin hikas fali ema sira ne'ebé oras ne'e la hamutuk ona ho ita, iha ita nia leet,”dehan Madre Guilhermina iha Entrevista Eskluziva ne’ebé hala’o iha studio II, INDEPENDENTE Hudi-Laran, Dili, Segunda (27/10/25).

Madre Guilhermina hatutan, loron finadu hanesan loron ida ne'ebé maka igreja dedika ba matebian sira, nu'udar momentu ida ne'ebé importante atu ema hotu hasae orasaun no  iha missa sira.

"Entaun buat hirak ne'e hotu, fokus ba ita-nia matebian sira, tanbá ita hatene katak, Maromak mizerekodia sira ne'e liu ona, máibe ita ema dehan katak to'o dalan ne'ebé liu naksalak mak kait netik sira iha fatin seluk karik, sira laiha kbiit ida atu harohan ba sira nia-aan rasik, entaun ita sira moris ne'e mak harohan ba sira,”tenik Madre Guilhermina.

Nune’e, Madre esplika, tuir fiar sarani no tuir teolojia dehan katak, Igreja iha oin tolu, ida mak Igreja perigrina, mak sarani sira ne'ebé moris ne'e, hanesan perigrina da esperansa.

Nune’e mós Igreja Purgante mak sira ne'ebé mate, maibé seiduak ba iha lalehan no Igreja Trumfante ne'e mak dehan katak, matebian sira hamutuk ho anjo sira no maromak hodi hahi ba nafatin.

“Tanba ne'e, ida ne'ebé maka iha kbiit atu hasa’e orasaun maka ita sira ne'ebé moris no ida ne'ebé simu ne'e mak Igreja Trumfante ita nai Jesus mak simu matebian sira iha lalehan,”haktuir Madre Guilhermina.

"Nune'e ho fulan Novembru ne'e la'ós ita reza de'it iha loron 02 ne'e, maibé ita dedika fulan ida ne'e ba ita-nia maluk sira hanesan bá vizita rate ne'e katak, diak tebes tau ai-funan ne'ebé simbolu di'ak dame no domin ne'ebé ita iha ba matebian sira",nia esplika.

Entretantu, Madre akresenta liu tan, tuir kalendariu Igreja Katólika nian katak, iha loron 01 Novembru nu'udar loron ba Santo no Santa sira no loron Matebian nian mak iha loron 02 Novembru, nu’udar loron espesial ba sira.

Tanba ne'e, importante mak sarani sira halo orasaun no reza misa missa ba matebian sira, nune’e iha o1 Novembru kalan familia sira hatur hahan, ida ne’e hatudu respeitu ba matebian sira ne'ebé la hamutuk ona ho ita.