Ministru Agrikultura, Pekuaria, Peska no Floresta (MAPPF), Marcos Mameta da Cruz hateten, ba konstrusaun projetu eskema irigasaun iha munisipiu rua ne’e, Ministeriu prevee orsamentu montante milaun $7,990,888.13.
Nia dehan, projetu eskema irrigasaun ne’e sei hala’o iha sahen ka mota entre Natarbora ho fatuberliu iha Postu Adminitrativu Soibada.
“Ita halo kontratu ho Kompañia CCECC hodi halo konstrusaun eskema irrigasaun durante tinan rua, nune'e mós bee sei fornese ba natar hamutuk 700 resin ektares,”dehan nia ba Jornalista sira iha Salaun MAPPF, Komoro, Tersa (29/10/25).
Nia hatutan, irigasaun ne’e sei fó benifisiu ba agrikultor sira hamutuk 200 resin no servisu ne'e sei kobre projeitu ida ne'e tuir brajen ne'e nia naruk 300 metru no mós sei halo kanal prinsipal 6.8 kilometru.
Aleinde ne'e, sei halo odamatan ba fatin rua ne’e, no mós sei halo moru protesaun ho servisu sira ne'e inklui iha laran ho orsamentu maka montante milaun $7 resin ne’e.
Governante ne’e haktuir, atu dezenvolve setór agrikultura, hodi hasa’e produsaun iha rai laran maka hadia uluk infraestrutura sira.
“Ita presiza fatór ida importante hodi dezenvolve setór agrikultura maka insfraestratura baziku no irrigasaun, ita hotu hatene katak tempu udan bee barak no tempu bai-loron mota barak maran,”tenik Ministru Marcos.
Maibé mota iha Sahen ne'e, bee menus tanba presiza halo konstrusaun irrigasaun hodi hasa'e nivel bee, realmente bee iha kraik no natar iha leten nune’e aplika sistema ida hodi blokeia mota ne'e, hafoin tau bokadura no brajen hodi hetan bee atu fasilita ba natar ne'ebé kultiva.
“Ita hatene Natarbora ho Fatuberliu rai bokur pontesial atu bele produs no halo natar, maibé durante ne'e rai sira sei abandona la kultiva no ita espera konstrusaun irrigasaun ne'e, tinan rua sei konklui projeitu ida ne'e, sei fornese bee ba natar sira ne'e,”.
Kompaña CCECC sei halo konstrusaun projeitu eskema irrigasaun durante tinan rua hafoin konklui projeitu ida ne’e hodi fornese bee ba natar sira hodi hasa'e produsaun iha rai laran.
Iha fatin hanesan, Country Manager Kompañia CCECC, Li Lei agradese ba Ministeriu Agrikultura Pekuaria Peskas no Florestas ne’ebé fó fiar ba kompañia refere hodi konstrui tan irigasaun iha Munisipiu Manatutu no Manufahi.
Nune’e, kompañia refere kompromete sei konklui konstrusaun ne’e tuir termu kontratu ne’ebé iha.
Entretantu, Kompañia CCECC, antes ne'e kompaña refere halo ona projeitu irrigasaun iha Galata Venilale ne’ebé atinji ona 100%, nune’e iha fulan Novembru sei halo inaugurasaun.
