Diretora DNTT Maria Antonia Vitor da Costa hatete, relasiona ho loron matebian ka finadu nian ne’ebé sei selebra iha loron hirak tuir mai, maka DNTT no Diresaun Nasional Tranzitu Seguransa Rodaviariu Nasionaol apela ba motorist transporte públiku sira hanesan bis, mikrolet no anggunan labele tula pasajeiru tuir kapasidade.

“Dala barak ita sempre hasoru pasajeiru balun tur iha kapon leten, balun tabele odamatan sorin-sorin no att liu tan maka balun tabele iha kotuk, ida ne’e perigu tebes ba ita nia vida no la seguru durante ita hala’o viagem,” dehan nia liu husi Konferensia Imprensa ne’ebé hala’o iha Salaun DNTT, Balide, Dili, Kuarta ne’e (29/10/25).

Diretóra ne’e hatutan, atu evita asidente tráfiku maka DNTT hamutuk ho Polisia Tránzitu Nasional no munisipiu liu husi oportinidade ida ne’e fó hanoin no hato’o ba motorista sira hotu katak tuir artigu 54 kódigu estrada, aliña 3 no 4, bandu tula pasajeiru liu kapasidade kareta nian no labele ona tula pasajeiru bainhira laiha ona fatin.

Nune’e, apela atu hotu-hotu tenke kumpri regras tránzitu nian, nune’e bele to’o iha fatin destinasaun ho seguru.

Iha fatin hanesan Xefe Departamentu Kordenasaun Jestaun Risku no Formasaun Edukasaun Sivika, Superintendente Assistente Polísia Domingos Gama husu ba motorista atu nafatin kumpre regras ne’ebé estabelese ona.

“Iha oportunidade ida ne’e avizu ba kondutor no pasajeiru sira, seguransa ba vida ne’e iha idak-idak nia liman, tanba ne’e husu atu kumpri regras no lala’ok tránzitu nian bainhira hala’o viagem ho distansia ne’ebé dok, atu bele to’o iha fatin ho seguru,”nia apela.

Entretantu, iha biban ne’e, Superintendente Assistente Polísia Domingos Gama apela ba Komandu PNTL, liliu seksaun tránzitu iha Munisipiu 13 inklui RAEOA, atu apoiu seguransa ba atividade pasa revista ba transporte sira ne’ebé tula pasajeiru liu kapasidade transporte nian.