“Setór saúde aat loos, halo ita triste, haree iha ospital referal Maubisi, Maliana, Suai, Oecusse, sira ne’e, uniaun europeia mak halo iha 2003 ka 2004, edifisiu diak, iha mediku, maibé to’o agora la hanoin atu halo rehabilitasaun, bee moos iha ospital sira, eletrisidade iha HNGV la lolos, Iha Gúidu Valadare ne’e doutor diak, barak mak halo sakrifisiu maibé vensimentu ba doutor ladiak, doutor ida bele manan 300 dolar, asesor ida koalia ingles portugues la hatene manan mil to’o 7 mill, tan deit partidu mak rekomenda,” dehan nia liu husi Konferensia Imprensa ne’ebé hala’o iha Hotel W, Kuala Lumpur, Malázia, Tersa ne’e (28/10/25).
Prezidente Repúblika mós preokupa ho politika sira liu-liu iha Ministeriu Saúde ne’ebé muda kargu xefia sira ba mai no laiha fasilidade ba doutor sira liu-liu iha área remotas
"Politiku saida mak ne’e, diretor sira iha ospital muda ba mai, ita iha mediku sıra iha suku no foho sıra ne’e diak, maibé hela fatin laiha, klinika ne’e aat seida’uk rehabilita, tuir lolos sira ne’e mak tenki apoia makas ho transporte labele falta, medikamentu iha ne’ebá harii uma dignu ba sira, fó komputador no internet gratuita ba sira atu sira bele aprende no sira bele hato’o informasaun kona ba medisina, nunee governu tenki tau matan ba ida ne’e,”tenik PR Horta.
Entretantu, iha biban ne’e, Prezidente Repúblika husu ba governu no liña ministeriu hotu tenki tau matan ba dezenvolvimentu setór saúde iha Timor-Leste.
