Suku 10 Sei Halo Eleisaun Orgaun Suku iha 27 Abril Featured

By Ekipa INDEPENDENTE Abril 17, 2024 173
Sidadaun sira forma atu ezersese sira nia direitu votu. Foto:Dok/INDEPENDENTE. Sidadaun sira forma atu ezersese sira nia direitu votu. Foto:Dok/INDEPENDENTE.

DILI: Tuir dadus suku sanulu iha teritoriu Timor-Leste, sei halo eleisaun orgaun suku iha loron 27 fulan-Abril, tinan ne’e.

Suku sanulu ne’e kompostu husi Suku Leqitura iha Postu Administrativu Aileu Vila, ho total kandidatura mane na’in 5 no iha Suku Bocolelo iha Postu Administrativu Laulara, Munisipiu Aileu total kandidatura mane na’in 2.

“Iha Munisipiu Dili, iha Suku Ailok, Postu Administrativu Cristu Rei, iha kandidatu na’in 5, Suku Bebonuk iha kandidatu na’in 6, iha Suku Madohi, na’in 9, Suku Manleuana na’in 4 no Suku Mantelolão iha kandidatu na’in 1,” Online INDEPENDENTE sita iha komunikadu.

Ho nune’e, iha Suku Sikone-Diloli, Postu Administrativu Barique, Munisipiu Manatutu, iha kandidatu mane na’in-2, Suku Laicore Postu Administrativu Laclo, iha kandidatu na’in 3 no mós iha Suku Builo, Postu Administrativu Ossu, Munisipiu Vikeke iha kandidatu mane na’in 4.

Total kandidatura husi suku 10 ne’e hamutuk na’in 41 kompostu husi mane na’in 39 no feto na’in 2.

Molok ne’e, Governu liu husi reuniaun Konsellu Ministru iha loron 20 fulan-Marsu tinan ne’e, aprova ona projetu dekretu lei Governu nian ne’ebé aprezenta husi Ministru Administrasaun Estatal, Tomás do Rosário Cabral, ne’ebé estabelese data ba realizasaun asembleia aldeia no konsellu suku iha ámbitu prosedimentu eleisaun lider komunitáriu sira.

Nune’e, tuir kalendariu ne’ebé aprova ona, eleisaun orgaun suku ne’e sei hala’o iha loron 27 fulan-Abril no apuramentu ba rezultadu sei termina iha loron 28 fulan-Abril, tinan ne’e.

Tanba ne’e, bainhira laiha kandidatu xefe suku ne’ebé maka hetan votu válidu liu metade ne’ebé fó-sai, sei realiza fila fali votasaun daruak entre kandidatu rua ne’ebé hetan votu maioria iha loron 13 fulan-maiu tinan 2024.

Entretantu, prosesu konstituisaun meza eleitorál suku no kandidatura ba eleisaun Xefe Suku no ninia kontensiozu, sei hala’o iha loron 12 fulan-abríl tinan 2024.  Períodu informasaun públika no edukasaun eleitór kona-ba prosesu eleisaun lideransa komunitária nian sei hala’o to’o loron 24 fulan-abríl tinan 2024.

Enkuantu, rekorda katak, iha loron 28 fulan-Outubru 2023, IX Governo liu husi Servisu Tekníku Administrasaun Eleitoral, (STAE) halo ona eleisaun sira ne'ebé koresponde ba maioria husi suku hotu, iha tinan kotuk, maibé eleisaun iha suku sanulu ne'ebé mandatu sira iha ona to'o tinan ida-ne'e, nune'e daudaun ne'e presiza atu ajenda ba realizasaun eleisaun ba suku sanulu iha loron 27 fulan-abríl tinan 2024.

Rate this item
(0 votes)

Independente Digital TV