Ministra Edukasaun (ME), Dulce de Jesus hatete, ko'alia kona-ba Lian Ofisiál Tetum no Portugés iha Eskola sira, hanorin Tetun ho Portugés, profesór sira tuir formasaun ba Lian Portugés liu husi INFORDEPE ne’ebé kopera ho Governu Portugés ho Timor-Leste no mós iha eskola Kafé.
Ministériu Edukasaun mós iha prográma pro Portugés ne'ebé halo tiha ona teste bá Professor sira, ho sira nia grau balu ki'ik liu iha trasa ona formasaun sira atu responde tuir nesessidade idak-idak nian.
"Esforsu ita halo kontinua fila-fali ba ita idak-idak mós haka’as ita-nia aan atu aprende mezmu ké ita halo formasaun maibé kuandu ema lakohi aprende mós rezultadu sei la di'ak, tanba ne'e la'os Governu la tau importánsia, governu investe maka'as tebtebes iha dezenvolvimentu lian Portugés, lian Tetun ita sei iha prosesu hela, maibé lian Portugés ita iha investimentu ida," dehan nia hafoin hasoru Vise Primeiru Ministru no Ministru Koordenadór Assuntu Sosiais no Ministru Dezenvolvimentu Rural Habitasaun Komunitaria, iha Palásiu Governu, Segunda (15/04).
Nia fundamenta, agora dadaun iha tinan-tinan mais de rihun sanulu iha Estudantes Kafé ida ne'e mós governu mak tau orsamentu ba, tanba ne'e mak enkoraza mós labarik sira atu labele baruk aprende, tenke aprende barak.
"Ita boot sira hatene katak iha Ministériu Edukasaun ne'e iha INFORDEPE nia knaar ne'e mak fó formasaun ba profesór, ha'u hanoin atu dehan katak sei la fó formasaun bá matéria ka ba espesialidade profesór sira-nian ne'e, ne'e mós loloos," nia dehan.
Tanba INFORDEPE tinan-tinan aloka orsamentu, tinan hirak liu ba INFORDEPE iha mós koperasaun Universidade Nasionál Timor Lorosa’e halo formasaun ba profesóres sira, kada tinan tau orsamentu barak tebes ba formasaun iha nível ensinu hotu-hotu.
"Ita mós serbisu ho Governu Australia fó nafatin formasaun, ita boot sira akompaña katak iha prográma ida ne'ebé mak agora fó akompaña iha jestaun sala de aula, observasaun sala de aula halo monitorizasaun ne'e hotu iha prográma ne'ebé mak integradu tebtebes, ha'u hanoin iha Ministériu Edukasaun ne'e iha prográma sira ne'ebé mak atu dehan katak fó apoiu ba profesóres sira ne'e naton," nia dehan.
Nia afirma, iha mentór nasional no mentor lokál sira iha ne’ebá mak fó apoiu apoiu ba profesór sira, karik atu hetan informasaun di'ak liután katak iha tinan 2024 formasaun hira mak halo bele konfirma di'ak liu tan ho INFORDEPE, purke orsamentu aloka iha INFORDEPE ne'e mós iha Ministériu Edukasaun nia okos.
Formasaun atu halo saida, formasaun maka pedagójia, lingua no matéria espesialidade sira nian ho materia balun matéria jerál sira.
