Semana ida, APC Rejista Xefe Família 36 Afeta Dezastre Naturais Featured

By Graça de Carvalho Abril 16, 2024 198
Komunidade nia uma ne'ebe hetan estragus husi dezastre naturais. Foto:Media Gabinete SEPS. Komunidade nia uma ne'ebe hetan estragus husi dezastre naturais. Foto:Media Gabinete SEPS.

DILI: Durante semana ida, hahú husi loron 08 to’o 15 fulan abril tinan ne'e, Autoridade Protesaun Sívil rejista Xefe família hamutuk 36 afeta dezastre naturais iha territóriu nasionál no hetan ona apoiu emerjénsia.

 Xefe Seksaun Relasaun Externa, Nelson Nunes Oleans hatete, durante semana ida ne'e, iha rejiaun Timor-Leste normal no akontese tipu dezastre mak CNOPC ho  APC rejista hamutuk Xefe família 36.

“APC rejista  uma hamutuk Xefe família 36 mak hetan estragus liu-liu iha munisipiu sira hanesa Munisípiu Baukau ahi han uma ida, Bobonaro anin sobu uma ida, ahi han uma ida, rai halai uma ida, Ermera anin sobu uma-lima, bee sa’e uma-rua, ahi han uma-ida, rai halai ida,  Likisá anin sobu uma ida, ahi han uma ida,  Manatuto bee sa’e uma-10, Manufahi bee sae  uma-rua, RAEOA anin sobu uma ida, ahi han ida no Viqueque anin sobu uma ida,” Dehan Nelson liu husi Konferensia Imprensa, iha salaun APC Kaikoli, Segunda (15/04).

Relasiona dazastre naturais ne’e, nia dehan, Komandu APC Munisípiu ho parseirus relevante forñese asistensia emerjénsia ba familia afetadus sira mak hanesan Ai-han no la’ós ai-han.

“Ami hakarak vítima sira-ne'ebe afeita ba dezastre, ami husi APC no mós parseiru relevante ne'ebe suporta APC iha munisípiu sira hotu halo kedas atuasaun ba vítima sira no ajuda assisténsia umanitária hanesan ai-han no la’ós ai-han,” Nia relata.

Nia afirma, dadaun Komandu operasionál  sira iha munisípiu sei halo hela levantamentu ba dadus ba uma sira-ne'ebe mak hetan estragus husi dezastre naturais .

“Komandu Operasional APC Munisipiu sira sei kontinua halo hela levantamentu detaillus kona-ba sasan ne'ebe estragus no lakon,” Nia relata.

Nia informa, hahú husi janeiru-abril tinan 2024 ne'e APC rejista ona Xefe família 1 resin mak afeita ba dezastre naturais.

“Agora ita  bazeia ba dadus, dadun ne'e ita haree lai ba vítima sira-ne'ebe mak iha tinan kotuk, agora sira tinan kotuk seidauk  rezolve hotu, ita haree tiha sira tinan kotuk, haree rezolve hotu ba rekuperasun, depois mak tinan ida-ne'e, dadaun ita so ajuda de’it asisténsia emerjénsia ba sira-ne'ebé hetan dezastre hanesan ai-han no la’os ai han,” Nia hakotu.

Rate this item
(0 votes)

Independente Digital TV