Iha semana hirak ne’e, mosu preokupasaun boot relasiona ho subsidiu saude $600 no subsidiu transporte $1.600 kada fulan ba deputadu idaidak. Prezidente Repúblika, José Ramos Horta mós preokupa ba ida ne’e.
Ba kestaun ne’e, Primeiru Ministru, Kay Rala Xanana Gusmão, subsidiu saude no transporte ne’e kompeténsia Parlamentu Nasionál nian.
"Kona-ba subsidiu transporte no saúde ba deputadu sira ne'e iha Parlamentu Nasionál mak ko'alia no ha'u labele manda fali deputadu sira," dehan PM Xanana ba jornalista sira hafoin enkontru ho Xefe Estadu iha Palasiu Prezidensia Bairu-Pite, Kinta (30/11).
Molok ne’e, Prezidente Repúblika, José Ramos Horta hatete, nia iha kapasidade atu veta lei subsidiu saúde no transporte ba deputadu sira, maibé sei ko'alia ho Primeiru Ministru, Kay Rala Xanana Gusmão.
Tuir Xefe Estadu nia haree, subsidiu ba deputadu sira ne'e boot tebtebes, tanba estadu aloka ona osan iha Orsamentu Jerál Estadu ba asuntu saude.
“Ema ida ne'ebé moras kualkér sidadaun, deputadu, membru governu ka sidadaun baibain tenke ba li'ur, governu nunka nega. Dala-ruma defisil, depois iha mós abuzu, balun moras de'it uitoan ba halo kedas konsulta iha Singapura, ne'e lá'os populasaun, polítiku balun,” dehan PR Horta hafoin partisipa Kongresu Nasionál PERMATIL dahuluk, iha salaun CNE Laline Larigutu, Kuarta (29/11).
Horta hatete, subsidiu ba saude no transporte ho valor $600 no $1.600 kada fulan ba deputadu idaidak sei halo deputadu sira-nia naran foer no hamosu injustisa boot.
Tan ne’e, nu’udar PR, nia dehan, sei ko'alia ho PM no PN atu haree labele iha klasse ida ne’ebé hetan benefisiu hotu-hotu no barak loos.
Tanba, iha prióridade seluk hanesan aumenta orsamentu aihaan ba kosok-oan sira, ba inan sira, ba ferik-katuas sira, ba joven sira, no ba estudante sira.
"Ne'eduni ha'u haree di'ak liu sira hotu-hotu sukat didi'ak, se la'e eleisaun ruma mai deputadu sira ne'ebé foti kartaun verde ne'e lalika hakfodak sira-nia kadeira sei tuun. Ha'u iha kapasidade atu veta lei subsidiu transporte ba deputadu sira, ha'u sei ko'alia ho maun boot Xanana, purtantu ho konsiénsia ha'u labele simu buat ruma nune'e, atu haree polítika espesiál ba saúde tenke haree ba hotu-hotu, labele haree ba klasse ida," dehan Horta.
Entretantu, iha 16 Novembru 2023, deputadu sira iha PN aprova jeneralidade projetu lei númeru 4/VI (1a), kona-ba alterasaun ba lei númeru 5/2004, 5 Maiu, ne’ebé estabelese estatutu deputadu, ho votu a favor 50, kontra ida, no abstensaun lima.
Depudau ne’ebé kontra mak Prezidente Parlamentu Nasionál husi bankada CNRT, Fernanda Lay. Enkuantu, deputadu na’in lima ne’ebé vota abtensaun mak Vise Prezidente PN husi bankada CNRT, Maria Teresinha Viegas, no deputadu husi bankada PLP na’in haat, mak hanesan: Maria Angelina Sarmento Lopes, Abel dos Santos, Helder Freitas, no Adolfo Martins.
