Ministru Petroleu no Rekursu Mineral (MPRM), Francisco da Costa Monteiro informa, iha posibilidade kampu Bayu Undang sei maran iha fulan Dezembru nia rohan ka iha inisiu 2024.
Francisco esplika, maran ho sentidu katak sei la produs ekonómiku ona, maibé la sigifika mina hotu ona.
"Ne'e ha'u tenke klarifika tanba uluk ha'u temi beibeik ona, mais bele taka nia produsaun iha fin tinan ida ne'e ka inisiu tinan oin 2024," dehan nia hafoin halo lansamentu konkursu publiku setór Metaliku nian iha Hotel Timor, Kinta (30/11).
Tanba ne’e, nia dehan, bainhira governu kontinua foti osan billaun $2 kada tinan, la to’o tinan 2033 ka 2034 osan Fundu Petroliferu bele mohu.
“Se ita kontinua nafatin foti sai husi Fundu Petroliferu osan ho montante ida uluk nian, $2 bilioens kada tinan, entaun iha 2033-2034 osan ne'e bele mohu ona," nia dehan.
Maibé, nia deha, se foti natoon hanesan governu dasia halo, husi billaun $1.6 to'o billaun $1.9, bele to'o 2034-2035 mak osan FP nia hotu.
Tan ne’e, nia husu mós ba governu atu dezenvolve lalais ona fonte rendimentu alternativu sira seluk.
"Setór sira seluk mak hanesan ita temi bebeik ona Agrikultura, turizmu no setór seluk. Ministériu Petroleu no Rekursus Minerais haree kona-ba petroleu no minerais nian ne'ebé ami nian mak ne'e tenke halo serbisu maka'as antes to'o 2034 ne'e ita iha ona produsaun lubuk ida iha parte petroleu no mineral nian," katak nia.
Tan ne’e, nia hatutan, prioridade ba 2024 nian ba MPRM mak dada kadoras mai Timor-Leste.
"Esforsu hotu sei haree ba ida ne’ebá par que iha 2024 ne'e desizaun ida mak uniku bele akontese duni iha 2024 ne'e. Depois projetu tasi mane, ita prepara kondisoens par que ita dada kadoras ho planta LNG mai karik fasilidade sira bele prontu ona hodi bele apoiu hanesan Suai Suply Base ho Auto Estrada ba to'o Natarbora nian," dehan nia.
