Diretora Jerál Kuidadu Saúde Primaria, Elizabet Letemão hato’o kestaun ne’e  bainhira partisipa atividade ho Tema   “Hasa’e Konesimentu Komunidade no mos Estudante  Sira, Husu Atu Prevene Aan Husi Moras HIV-SIDA, Hahu Husi Familia no mos Komunidade Atu Prevene Aan ba Moras HIV-SIDA, Atu Labele fo Impaktu ba Komunidade ka Sosiédade Sira”.

Elizabet haktuir, hahu husi 2003 rejistu ona kazu barak mak ba HIV-SIDA hamutuk 1.500 maka afeta ba moras HIV-SIDA, tanba iha momentu ne’eba seidauk iha ekipamentu atu halo tratamentu masimu ba moras ne’e.

“Ita iha kazu ne’ebe mak barak 1.500, maibe iha tempu ne’ebá ita tuir mata-dalan, ita lahalo tratamentu, entaun ema sira-ne’ebe mak ho moras HIV-SIDA ne’e iha tempu ne’ebá barak mak lakon, maibe signifika katak la tama iha sistema, tanba nia la tama iha tratamentu,” Dehan nia, iha salaun Katedral vila-verde, Kinta (30/11).

Tanba nia husu ba komunidade sira atu hakbesik aan ba sentru saúde sira, atu nune’e bele ba koko raan, atu bele hatene didi’ak estatus rasik, atu bele prevene aan antes, atu nune’e labele afeta bebeik ba moras HIV-SIDA ne’e.

“Ida-ne’e ita hakarak avizu ba iha ita-nia komunidade hotu katak voluntariamente ida-idak ba teste raan, atu nune’e bele hatene ita-nia estatus, atu nune’e ita bele hatene katak ita ema ida-idak iha moras ne’e ka la’e?, tanba ne’e  husu ba komunidade hotu katak ema ne’ebe mak iha moras HIV-SIDA, sira mos moris hanesan ita bai-bain, ne’ebe ita labele halo diskriminasun ba sira, maibé ita hahú husi ita-nia familia to’o ba komunidade, tanba ita sira-ne’e mak tenke apoiu ba sira, atu sira bele fiar ann, sira bele iha vontade atu hahú sira-nia tratamentu no hala’o sira-nia vida moris hanesan ita ne’ebe mak la hetan moras ida-ne’e,” Nia Informa.