PM Xanana hatete, nia sei delega ekipa ida hodi vizita bairu idaidak iha munisipiu sira hodi halo avaliasaun ba juventude ne’ebé kriativu harii prezepiu.

“Ha’u apela ba juventude iha Dili no munisipiu hotu-hotu iha kada suku imi hola parte ba tuir kompetisaun harii prezepiu Natál, hanesan uluk halo tiha ona. Ho ida ne’e sei fó premiu ba primeiro lugar, segundo lugar, terseiro lugar to’o quinto lugar, ne’e ba prezepiu di’ak liu," dehan PM Xanana liu husi komunikadu ne'ebé Jornal INDEPENDENTE asesu, husi Media Gabimete PM, Domingu (03/12).

Kriteria prinsipal ba avaliasaun, nia dehan mak juventu iha suku laran tenke harii paz no domin.

“Labele tuku malu no estraga malu, tanba se prezepiu ida iha suku laran mak hetan primeiru lugar maibé ema baku malu no tuku malu, ne’e la merese hetan,” dehan Xefe Governu ne’e.

Xanana dezafia juventude sira atu idaidak hatudu sira-nia kriatividade no dezeña prezepiu la uza materiál besi, maibé tenke ho materiál tradisional hanesan ai ka au, duut, hali abut no pinta prezepiu natál no Menino Jesus bele uza kor oioin hodi hafurak uma prezepiu ho diak.

Aleinde ne’e, nia hatete, governu sei koordena ho Komandu Jerál Polisia Nasionál Timor-Leste (PNTL) atu halo kontrolu ba kualker prezepiu ne’ebé harii besik estrada atu ema labele tuur no hemu tua iha laran.

Governu, komunikadu ne’e haktuir, la premite atu juventude sira kria konflitu durante selebrasaun loron Natál no tinan foun. Tanba Natál no tinan foun atu lori moris dame no kslok ba ema hotu.