Kompaña importadór rua ne’ebé sei asina akordu ho Ministériu Komersiu no Industria (MKI) mak kompaña Loja Creative Furak Lda no Alfa Dili Unipessoal Lda.

"Aban (ohin) tuku 10 sira sei asina fali (kontratu), ba kompaña rua: Alfa Dili ho Kreatif Furak, kontinuasaun ba implementa politika subsidiu (foos)," informa Ministru Filipus Nino Pereira ba jornalista sira, iha nia-knaar fatin, Bebora, Dili, Segunda (15/01).

Kompaña rua ne’e, nia dehan, sei faan foos ho kuantidade saka 2.500 hanesan iha faze dahuluk.

MKI, nia dehan, deside hodi asina tan kontratu ho Kompaña Kreatif Furak tanba kompaña refere hahú subsidiu foos faze dahuluk husi fulan Outubro to'o Dezembru ho di’ak.

Enkuantu ba kompaña Perisos, nia dehan, MKI sei haree lai tanba iha implementasaun faze dahuluk, kompaña ne’e obriga kliente sira sosa mós sasa sira seluk.

"Ita sei haree fila fali tanba ida Perisos ne'e iha problema uitoan tanba aleinde sira distribui mais sira mós obriga kliente sira seluk par atu faan mós mina, mie, masi-midar, ne'ebé ita ladun satisfas ho saida mak sira halo. Ba ida ne’e mak ita deside Loja Creative Furak ho Alfa Dili," dehan nia.

Kompaña Kreatif Furak, nia dehan, sei mantein ho foos marka Beruang Merah 20kg ho folin $9. Enkuantu Kompaña Alfa Dili sei faan foos 25kg ho folin $11.50.

Tuir tarjetu ne’ebé Konsellu Ministru aprova, nia dehan, subsidiu foos ne’e sei remata iha fulan Marsu tinan ida ne’e.

Iha 17 Outubru 2023, Ministru Prezidensia Konsellu Ministru no Ministru Koordenadór Asuntu Ekonomiku interinu, Hermenegildo ‘Agio’ Pereira, asina akordu ho empreza importadór lima ba implementasaun subsidiu foos faze dahuluk.

Importadór ne’ebé asina kontratu ho Ministru Agio mak empreza Perissos Victoria Lda, Loja Creative Furak Lda, Lisun Importação no Exportação Lda, Jusibel Unipessoal Lda, no Alfa Dili Unipessoal Lda.

Husi kompaña lima ne’e, so kompaña Creative Furak no Perissos Victoria mak implementa subsidiu foos refere.

Entretantu, subsidiu ne’e rasik remata iha fulan Dezembru 2023.