Nia haktuir, governu iha razaun hodi halo revizaun no verifika kontratu sira ne'ebé foin asina iha governu anterior, ida ne'e normál.

"Ha'u espera katak governu agora aselera prosesu atu hahú konstrusaun Aeroportu Internasionál Nicolau Lobato Dili," dehan José Ramos Horta bainhira partisipa seremónia ba estudante João Saldanha University iha Hera Dolok Oan, (15/01).

Maibe,nia argumenta, halo revizaun ne'e atu hare ba buat ruma ne'ebé sala, la'ós ba demora fali ninia prosesu.

"Ha'u espera sira ne'ebé halo revizaun ba kontratu Aeroporu Internasionál Nicolau Lobato, Dili  bele halo lalais no halo badinas, tanba ne'e ezijénsia ita nia adezaun ba ASEAN,"  tenik nia.

Tanba, dala barak ema ko'alia kona-ba turizmu, tanba ida mós ezijénsia kona-ba turizmu alternativu ba iha mina rai, tanba ne'e Xefe Estadu husu nonu governu konstitusionál atu book aan lalais ba Aeroportu Internasionál Nicolau Lobato, Dili.

Maibé, kontratu ne'e fó ba kompaña estatál rua husi Indonézia, atu nune'e relasaun entre TimorbLeste no Indonézia di'ak liu tan.

"Se ita hakarak relasaun metin ho Indonézia, ita hatete bei-beik temi, bei-beik maibé ita la duun fó kontratu ba kompaña Indonézia sira, maibé ita fó liu ba rai seuk," afirma nia.

Nia afirma,  kontratu ba tiha ona kompaña rua ne'ebé bo'ot ne'e estatál, estadu Indonézia tenke haree didi'ak halo servisu ho sira.

Maibé, governu iha rajaun atu bele halo revizaun ba buat hotu-hotu, liuliu sira ne'ebé asina tiha ona maibé seidauk implementa ne'e, tenke iha prinsipiu ida iha Timor, tanba demokrásia nune'e, estadu nune'e, para iha prezibilidade no tenke iha kontinuidade.

Nune'e, labele iha governu ida hahú projeitu ruma foun mai hapara tiha, ne'e hatudu irresponsabilidade, bainhira investidór sira haree polítika hanesan ne'e sira sei tauk la mai investe iha Timor Leste.