Projetu Dekretu Governu ne’e aprezenta husi Ministra Finansas, Santina José Rodrigues Ferreira Viegas Cardoso, kona-ba Ezekusaun Orsamentu Jerál Estadu ba tinan 2024, ne’ebé aprova husi Lei númeru 21/2023, loron 27 fulan Dezembru.
"Projetu Dekretu-Lei ida-ne’e ho objetivu atu estabelese regra kona-ba ezekusaun Orsamentu Jerál Estadu ba tinan 2024," dehan Komunikadu ne'ebé Jornalista Independente asesu husi Mídia Gabinete Prezidensiá Konsellu Ministru, (15/01).
Haktuir komunikadu, iha tinan 2024 sei konklui desentralizasaun funsaun pagamentu, ho servisu no entidade hotu ne’ebé ho autonomia finanseira alargada ne’ebé asume hodi halo ninia pagamentu rasik, ho exesaun pagamentu remunerasaun sira, ne’ebé kontinua halo husi DiresaunbJerál Tezouru.
Mudansa ida ne’e sei permite Diresaun Jerál Tezouru konsentra iha atribuisaun jestaun tezouraria no monitorizasaun ezekusaun orsamentál nian, ne’ebé nu’udar melloria kualitativa importante ida iha jestaun finansas públikas.
Diploma ne’e mós halo ajuste ki’ik iha prosedimentu ezekusaun orsamentál nian, tuir revizaun ba Lei númeru 2/2022 loron 10 fulan Fevereiru, liu-liu kona-ba alterasaun orsamentál.
Molok ne'e mós Ministra Finansas Santina Viegas Cardoso klarifika, tanba orsamentu 2024 nian Ministériu foin update iha sistema, entaun sistema foin la'o dadaun komesa horisehik Ministériu sira bele asesu ona depois de ida ne'e sei atualiza fila-fali iha portal.
"Komesa horisehik normalmente kuandu ami fó ona envelope bá Ministériu sira, sira sei hatama espesimen asinatura, sese de'it mak iha autorizasaun bá asinatura bá despeza normalmente han semana ida sira bele komesa ona sira nia ezekusaun, ne'e prosesu Administrativu sei la'o hela," dehan nia hafoin partisipa reuniaun Konsellu Ministru iha Palásiu Governu, Kuarta (10/01).
Entretantu, Kona-ba ezekusaun Orsamentu Retifikativu 2023 nian ne'e depois fó tempu bá Ministériu Finansas semana ida atu bele fó sai Informasaun tanba dadaun sei halo hela rekonsiliasaun ikus nune'e seidauk bele fó sai númeru senterza ezekusaun.
"Agora dadaun sira halo rekonsiliasaun hela entaun ami seidauk bele fó númeru final mais ita boot sira bele bá portal, depois fó ami semana ida tanba ami halo hele rekonsiliasaun ikus," nia dehan.
Nia dehan, tanba tuir lei diresaun tezoru bele halo prosesu pagamentu bá nia Papel sira ne'e bele haruka bá banku to'o dia 15 agora depois to'o ida neeba Ministériu Finansas bele iha númeru Final ona ezekusaun 2023 nian.
"Orsamentu hira mak fila-fali ba kofre Estadu depois rekonsiliasaun mak ami bele fó ba ita boot sira númeru final, to'o dia 15 Janeiru dokumentu hotu tezoru halo tiha rekonsiliasaun iha neeba ami bele fó númeru final bá ita boot sira hira mak fila bá Kofre Estadu," nia tenik.
