"Reuniaun anuál ne’e sei halibur parte interesada sira husi parte hotu-hotu mai husi rejiaun hotu iha mundu, atu bele serbisu hamutuk iha prioridade temátika haat ne’ebé iha interligasaun," dehan komunikadu ne'ebé diáriu ne’e asesu, horisehik.

Tematiku haat ne'e maka alkansa seguransa no kooperasaun iha mundu ida ne’ebé laiha unidade, intelijénsia artifisiál nu’udár forsa prinsipál bá dezenvolvimentu ekonomia no sosiedade, kria kresimentu no empregu iha era foun no estratejia longu prazu bá klimátika, natureza ho enerjia.

Programa inovativu ne’e dezenvolvidu bazeia bá reuniaun ne’ebé realiza antes ona ho nia senáriu ba sesaun sira tuir programa pilár importante haat ne’e.

Prioritizasaun ba temátika haat ne’e tanbá ohin loron, ema, sosiedade no mós empreza sira enfrenta realidade transforasaun mundiál ho problema barak ne’ebé akontese hanesan violénsia tráfiku iha médiu oriente nu’udár akontesimentu reál, mudansa profunda estruturál hahú hosi jeoekonomia, mudansa klimátika to’o inteleijénsia artifisiál.

Situasaun ne’e ejize liu atu dezenvolve plataforma no diálogu, parseria ne’ebé forte, estabelese kuadru polítiku ne’ebé forte, implementasaun teknolojia ne’ebé efikas atu bele lori benefisiu direta no bele implemeta iha sosiedade iha kurtu prazu.

Reuniaun annuál ne’e sei aproveita másima nu’udár fórum organizasaun internasionál bá kooperasaun públiku privada, hanesan plataforma bá diálogu inkluzivu bá tempu naruk.

Entretantu, PM Kay Rala Xanana Gusmão sei hasoru malu mós ho lider mundiál balun hodi deskute no hametin kooperasaun Timor-Leste iha setór oin-oin ne’ebé liga ho tema forum ekonómia mundiál.

Vita Xefe Governu nian ne’e akompaña husi ekipa Ministériu Negósiu Estranzeirus no Koperasaun ne’ebé sei fila hikas mai Timor iha loron 20 fulan Janeiru 2024.