Vise-Sekretáriu Jeral Renetil Metódio Caetano Moniz hatete, Ministeriu Saude tenki hola mediada imediata ba pesoal saúde sira tanba diskontinuasaun kontratu ba profissional saúde sira, hodi normaliza prosesu atendimentu saúde ba sidadaun sira.
Vise dehan, Medida sira neé tenki inklui destituisaun ka substituisaun ba oficial sira ne’ebé okupa kargu Xefia iha diresaun no instituisaun autonoma sira ne’ebé foin mak nomeia, maibé la iha kualifikasaun natón atu hala’o ninia servisu.
“Rekursus umanus iha área saúde, hare hosi kuantidade, kualidade no distribuisaun, ladauk natón atu garante asesibilidade no fornese atendimentu saúde ho kualidade ba populasaun tomak,” dehan liu husi konferensia imprensa, iha edifisiu RENETIL Farol, segunda (15/01).
Tan ne’e, Vise- Sekretaris RENETIL mos apela ba Membru sira neebé iha Governo, husi Vise-PM, Ministru sira, to’o kompanheiru sira ne’ebé hala’o kna’ar tekniku oi-oin iha Ministeriu Saude nia laran, atu foti atendimentu Saude ba sidadaun ne’ebé hanesan knár sagradu ida.
“Ita-boot sira hala’o hanesan kontinuasaun ba misaun atu Liberta Povu. Halao ita boot sira nia knár ho responsabilidade no kometimentu. Ba sira neébe mak halo parte ba Konsellu Ministrus, lori asuntu neé ba diskuti hamutuk iha KM, no fo solusaun neébe adekuadu,” dehan Vise- Sekretaris.
Karik labele rezolve problema neé, di’ak liu pesoal sira ne’eb’e lidera servisu saúde hakiduk deit ona husi kargu.
Tanba RENETIL prontu nafatin atu servisu hamutuk ho Governo no parte ne’ebé de’it maka hanoin diak ba rai ida neé nia dezenvolvimentu, atu garante politika ne’ebé forti iha área saúde, hodi hakonu objektivu libersaun povu.
iha fatin hanesan, sekretáriu jeral renetil joaquim russuo fonseca hatete, ministeriu saúde hapara pesoal saúde hamutuk ema na’in rihun rua, atus rua lima nulu resin neen, (2.256), laiha motivu ida.
entretantu, iha biban ne’e, RENETIL husu atu iha reuniaun konsellu ministru, ne’ebé sei mai, nonu governu tenki diskuti asuntu sira ne’ebé relasiona ho asuntu saude atu bele fó solusaun ne’ebé adekuadu no preserva ema nia moris.
