Nia dehan, kona-ba subsidiu $200 ba uma kain Prezidente Repúblika, José Ramos Horta, promulga ona no ministériu relevante sira seidauk hahú pagamentu.
"Maibé dadus iha hotu ona no fulan Dezembru nia laran sei hahú pagamentu, tanba konfirma hotu ona no sistema mós kompletu ona bainhira hahú ita boot sira sei hatene," PM Taur, iha Palasiu Prezidensiál, Bairru-Pité, horisehik.
Molok ne'e, Prezidente Repúblika, José Ramos Horta, promulga ona alterasaun dahuluk ba dekretu-lei númeru 37/2022, kona-ba subsídiu fin-du-anu ho montante US$ 200 ba ema vulnerável ka uma kain ne'ebé ho rendimentu ki'ik liu US$ 500 kada fulan.
Governu deklara antes ne'e atu atribui subsídiu fim du anu ho montante $200 ba uma kain hotu iha territóriu nasionál, maibé Xefe Estadu no sosiedade sivíl, la aseita no husu altera, nune'e governu halo alterasaun ba lejizlasaun ne'e hodi atribui de'it ba família sira ne'ebé ho rendimentu ki'ik.
"Ha'u kontente tebes tanba Governu rona sosiedade sivil sira, rona ha'u rasik atu fó de'it subsídiu $200 ba familia sira ne'ebé hetan difikuldade ho rendimentu ne'ebé kada fulan menus hosi $500 mai kraik, $500 ba leten sei laiha direitu atu hetan", dehan Xefe Estadu.
Xefe Estadu dehan, Governu aseita nia opiniaun no parte hotu, nune'e loron tolu ba kotuk ha'u promulga ona Dekretu-Lei ne'ebé foin lalais Konsellu Ministru halo alterasaun no dadaun ne'e hein de'it Governu halo pagamentu ba uma-kain iha territóriu laran tomak.
Antes ne'e mós, Ministériu Administrassum Estatal (NAE) submete ona dadus uma kain hamutuk 39.000 ba MSSI ho totál pagamentu milliaun $7,8 resin.
