Prezidente Bankada UDT, Francisco David Xavier Carlos hatete, kazu Pe. Abito Brites ninia prosesu ne'e malirin ona.

"Ita haree katak prosesu sira ne'e malirin tiha de'it, ida-ne'e faz parte segredu justisa dentru investigasaun, maibé ita haree ita-nia aman ba nasaun José Ramos Horta husu prosesu justisa tenke ho lalais atu hatene loloos kazu Amu Abito nian ho alin ida-ne'ebé tara aan iha sela detensaun ne'e," dehan nia, iha Parlamentu Nasionál, horisehik.

Francisco dehan, prosesu investigasaun kazu ne'e tenke la'o nafatin hodi fó justisa ba família no ema hotu tenke hanesan.

"Tenke iha klareza atu ita-nia nasaun tenke moris iha justisa. Maibé investigasaun lentu liu talves ne'e estratéjia ida husi parte investigador sira atu deteta kazu ne'e," tenik nia.

Nia haktuir, talves hotu-hotu iha liur dehan fasil julga, maibé sistema ne'e haree dentru investigasaun mak halo prosesu kle'ur hanesan ne'e.

"Maibé espera katak husi parte autoridade sira polisial, justisa tenke haree buat ne'e tanba justisa ne'e tenke ba sidadaun hotu hanesan labele iha diskriminasaun ba Timor-oan rasik," nia haktuir.

Vise-Prezidente Bankada CNRT, Patrocino Fernandes dos Reis hatete, Padre Abito nia mate parese familia agora hein hela justisa.

"Ami bolu atensaun ba Instituisaun ne'ebé mak servisu iha área justisa nian, servisu korajen, labele servisu tanba interferensia, maibé servisu ho korajen, vontade, profisionalismu, depois lori justisa ne'e ba povu," dehan nia.

Molok ne'e, Ministériu Públiku (MP) liu husi Prokuradór Titulár, Jacinto Babo, delega ona kompeténsia ba Polísia Siéntifiku Investigasaun Kriminál (PSIK), hodi kontinua loke investigasaun ba kazu ne'ebé hamate Padre Abito, iha area Dare.

"Ministériu Públiku delega ona kompeténsia ba Polisia Siéntifika Investigasaun Kriminál atu kontinua loke investigasaun ba kazu Padre Abito Brites nia mate, ne'ebé ita hein prosesu investigasaun de'it" dehan Jacinto.

Nia hatutan, MP fó kompeténsia ba PSIK atu investiga kazu ne'e, liu-liu haree bá motivu husi Padre Abito nia mate no sei halo ezamisaun ba iha materiál sira ne'ebé antes ne'e ekipa rekolla iha fatin akontesimentu.

"Ita mós sei rona parte hotu, liu-liu familia vitima,"dehan nia.

Entretantu, iha 23 Agostu2022, Bazeia informasaun inisiu husi PNTL, liu husi Xefe Seksaun Polisia Tranzitu Munisipiu Dili, Inspetor Domingos Sarmento Gama, Padre Abito mate tanba uniku asidente (kecelakaan tunggal) iha ninia viajen husi MSR ne'ebé hela iha area Ailok-Laran aseita no ikus mai Padre Abito tula MSR ho motor marka Jupiter MX kór azul ho xapa matrikula E.8081 TL Maibé bainhira to'o iha dalan klaran, tanba rai nakukun ona, sira deside fila fali mai Dili.

Padre Abito ne'ebé kondus motor halai husi diresaun seminariu Dare nian ba diresaun dalan foun rezidensia Mauhoka nian.

Bainhira halai tuun ba rai loloon iha Dare nia okos, tuir relatoriu asidente trafiku PNTL katak, Padre Abito la konsege kontrola motor ho nune'e motor halai sees husi dalan no monu tuun ba valeta kuak.

"Tuir intormasaun ita-nia sidadaun feto ne'e deklara katak Amu mak SMS hodi konvida malu atu sira nain rua ba haan hahaan ruma iha Dare, maibé sira na'in rua lao to'o iha dalan klaran haree ba kondisaun rai ne'e kalan ona, sira fila fali mai to'o iha dalan foun husi Dare nian tuun mai liu husi dalan señor Mahoka nia uma leten ne'e, entaun halai sees sokee moru ida ne'ebe halo hanesan penahan ne'e, sira Dare ba Dili," dehan nia.

Informasaun husi polisia ne'e ho baze deklarasaun husi sasin no rezultadu sena fatin akontesimentu (hasil olah tempat kejadian) ne'ebé halo hafoin asidente refere akontese iha 22 Agostu, tuku 8.30 kalan.

Tuir parte polisia, uniku asidente ne'e envolve ema nain rua; Padre Abito ho feto ida ho inisial MSR.

Tuir informasaun husi MSR ba polisia katak, iha 22 Agostu, Padre Abito ne'ebé hela iha Seminário Interdiosezanu São Pedro no São Paulo, Fatumeta, Dili, haruka mensajen ida ba nia hodi husu atu sira ba haan hahaan ruma iha area Dare.