Tuir Prezidente Autoridade Munisipiu Lautem, Domingos Sávio hatete, relasiona ho stok fó menus, sira haruka ona karta ida ba sentru lojistika iha munisipiu rasik atu hato’o ba iha sentru intergrade jestaun krize atu haree ba asuntu ne’e.
“Ami nia ema fa’an sasan iha merkadu la’o normal no maibé senti katak ami nia nesesidade bazika hanesan fós mak stok menus,”dehan nia iha via-telefone, (17/03)
Prezidente Autoridade ne’e konfesa katak iha ona kordenasaun ho Diretor Sentru Lojistik Munisipiu Lautem, atu nunee hatutan fali ba Sentru Lojistika Nasional (CLN) hodi distribui fós, maibé sei iha prosesu nia laran.
“Agora dadauk ami presiza kompaña sira ne’ebé fornese fós, no mós kria ona taks fors ba Covid-19 nian hodi atende,”nia informa
Kona ba folin sasan iha merkadu liu-liu ba folin fós, Prezidente Autoridade ne’e seidauk iha informasaun ba ida ne’e no seidauk simu relatoriu ida kona-ba folin sasan iha merkadu.
Maibé nia kria ona ekipa ida atu halo kontrolu ba folin sasan sira iha merkadu no agora dadauk ekipa sira ne’e halo hela sira nia servisu.
Antes ne’e, Governu liu husi Ministeriu Koordenador Asuntu Ekonomiku (MKAE) hamutuk ho Ministeriu Turizmu Komersiu no Industria (MTKI) koopera ona ho Sentru Lojistika Nasional (CLN), distribui ona fós ba kada munisipiu ida 1000 toneladas, ba munisipiu sira hanesan Covalima, Bobonaro hodi halo intervensaun ba merkadu sira iha munisipiu refere.
Presidente Sentru Lojistika Nasional (CLN), Agusto Junior mós antes ne’e deklara ona prontu distribui fós ba munisipiu sira hodi normaliza fali situasaun folin fós iha merkadu, relasiona ho impaktu husi aplikasaun serka sanitária no konfinamentu obrigatóriu iha Dili.
Tuir Junior ne’e katak, CLN liu husi liña kordenasaun ministerial bele distribui fós depende pedidu husi kada munisipiu sira bazeia ba kondisaun fós iha merkadu.
Entretantu, online Independente tenta konfirma fali Presidente CLN kona-ba stok fós ne’ebé menus iha merkadu Munisipiu Lautem, maibé too notisia ne’e públika seidauk iha resposta.
Jornalista: Saturnna da Costa
Editor: Jose Sarito Amaral
