Diretór Jerál MSSI, Rui Manuel Exposto informa,  prosesu atu apoiu estudante universitariu sira ne’ebé hela iha kos dadaun ne’e prosesu diskusaun la’o hela, hodi ko’alia kona-ba apoiu saida mak governu sei fó ba estudantes sira.

“Seidauk deside klaru, agora dadaun ne’e ami hanoin hela oinsá atu bele apoiu umanitáriu, maibé sei iha diskusaun,”dehan nia, via-telefone, Tersa (16/03).

Entretantu, Vise-Reitor Asuntu Akademiku no Edukasaun IOB, António Soares Martins  hateten, pedidu levantamentu dadus kona-ba estudante sira hela iha kos ne’e hatoo ona Ministériu Ensino Superior Siensia no Kultura (MESSK) atu nune’e bele simu apoiu ruma husi Ministériu Solidariedade Sosial no Inkluzaun (MSSI). Tanba ne’e parte universidade informa ona ba estudante sira ne’ebé hela iha kos atu priense formulariu ne’ebé iha ona.

“Ami informa ba estudante sira hotu ne’ebé mak eskola iha IOB, maibé hela iha kos atu bele priense sira ninia formulariu ne’ebé ami distribui liu husi Online depois sira sei manda ba kada sira nia departamentu, ami iha rihun 4-resin, maibé la hatene na’in hira mak hela iha kos,”dehan nia.

Jornalista: Julia da Costa

Editor: Jose Sarito Amaral