Tuir Ministru Prezidensial Konsellu Ministru, Fidelis Leite Magalhães hatete, atu hatán ba situasaun epidemiolójika coronavírus foun nian iha Timor-Leste, Primeiru-Ministru, Taur Matan Ruak, orienta ona membru Governu ne’ebé relevante kona-ba matéria ida-ne’e, atu aseleira prosesu, ne’ebé la’o hela, ba preparasaun resposta sosio-ekonómika ba efeitu Covid-19 nian.

“Atu nune’e, ho lalais hodi determina no disponibiliza apoiu umanitáriu, ekonómiku no sosiál ne’ebé presiza ba populasaun afetada sira,”dehan nia liu husi konferensia ba imprensa, iha Palasiu Governu,(17/03).

Nia esplika, hanesan iha tinan kotuk, Xefe Governu define ona, nu’udar prioridade nasionál, katak presiza fó resposta ida, lalais no efikás, ba kustu no implikasaun sosio-ekonómika sira husi Covid-19, atu nune’e ema sira ne’ebé afetadu husi efeitu negativu sira ne’e bele hetan protesaun iha situasaun ne’ebé lakon rendimentu.

Ne’ebé monu iha dezempregu, no atu empreza sira ne’ebé hasoru difikuldade bele sustenta sira nia gastus nian no atividade ekonómika.

Tanba ne’e, Governu oras ne’e, iha hela faze ikus finalizasaun husi prosesu preparasaun ba mekanizmu finanseiru ne’ebé nesesáriu hodi fó resposta ba impaktu Covid-19 nian.

Tuir Fidelis dehan, la kleur tan, proposta intervensaun sira ne’e sei submete ba Konsellu Ministrus ba apresiasaun no deliberasaun, hodi implementa ho lalais.  

Governu deside ona prolonga serka sanitária ka konfinamentu obrigatóriu iha Munisípiu Dili, oras 23:59 loron 2 fulan-abril.

Entretantu ba Munisipiu rua Baucau no Vikeke aplika mós serka sanitaria ou konfinamentu obrigatoriu too loron 29 fulan-Marsu 2021, horas 23:59.

Jornalista: Saturnina da Costa

Editor: Jose Sarito Amaral