“Ha’u informa ba Sua Eselénsia Prezidente Repúblika asuntu haat (4) kona-ba oinsá Governu nia pasu atu hakat, saida mak Governu tenke halo iha tempu oin mai,”dehan Xefe Governu ne’e ba jornalista sira, hafoin sorumutu ho Presidente Repúblika, Fransisco Guterres Lú Olo, iha Palacio Presidénsia Aitaran Laran Dili, kuarta ohin.

Taur esplika, matadalan primeiru mak Governu tenke haree orsamentu suplementar ida, Governu mós bele utiliza Orsamentu Jerál Estadu 2021 ou reforsu de’it iha Fundu Covid-19 nian.

“Ita tenke haree orsamentu suplementar ida, ke hanesan ita-boot sira hatene, Governu prepara Orsamentu 2021 ne’e fokus ba rekuperasaun ekonómika, hanoin katak situasaun Covid-19 menus, entaun ita-nia fokus ne’e ba iha rekuperasaun ekonómika, soké infelizmente situasaun ne’e sai tiha oin seluk, entaun ita tenke haree ho orsamentu ba ida ne’e. Ne’e iha dalan rua, ida iha Orsamentu Jeral Estadu no ida reforsu iha Fundu Covid-19, maibé Ministériu Finansas agora haree hela, iha tempu badak sei aprezenta proposta kona-ba pasu saida mak Governu tenke halo para iha osan,”PM Taur afirma.

Matadalan segundu, oinsa reforsa apoiu makas ba grupu sira iha liña frente, hanesan iha tinan kotuk, fó apoiu ba ekipa sira.

Matadalan terseiru, mak kona-ba intervensaun sósiu-ekonómiku, umanitáriu ne’ebé presija halo. Hanesan iha tinan kotuk, iha intervensaun iha área ekonómika, área sosiál, no área umanitaria.

Tanba ne’e, Xefe Governu halo ona instrusaun ba Ministru Asuntu Ekonómiku, Ministériu Finansas no Ministériu Solidariedade Sosiál no Inkluzaun, atu haree inisiativa saida, programa saida, matadalan saida mak tenke halo iha tempu ida ne’e hodi apoia sidadaun sira, ne’e importante tebes.

Matadalan ikus, mak kona-ba vasinasaun. Hanesan iha país balun vasinasaun la’o ona, maibé Timor-Leste seidauk. Tanba ne’e Governu halo esforsu hela oinsa hetan vasina ne’e.

Tuir PM Taur katak, atu hetan vasina ne’e la fasil tanba hadau malu maka’as iha mundu.

Entretantu, tuir Ministru Presidénsia Konsellu Ministru, Fidelis Magalhães informa, matadalan hirak ne’e ministeriu relevante sira sei aprejenta ba reuniaun Konsellu Ministru iha tempu badak atu bele deside.

Maibé Governu promete sei responde lalais situasaun sira ne’ebé povu enfrenta iha ambítu serka sanítaria.

Jornalista: Saturnina da Costa

Editor: Jose Sarito Amaral