Kordenador Forsa-Tarefa ba Prevensaun no Mitigasaun Surtu Covid-19, Rui Maria de Araújo informa, Ohin loron 17 fulan-marsu tinan 2021 Sala Situasaun Sentro Integrado Jestaun Krize relata, kazu foun na’in 8, iha mane na’in 4 no feto na’in 4, sira laiha sintomas.
“Kazu konfirmadu hirak ne’e entre idade tinan 21 to’o 30 hamutuk na’in 7 no idade tinan 15 iha ema na’in 1,”dehan nia liu husi zoom call, CDD (17/03).
Nia esplika, ema na’in hirak ne’ebé tama husi dalan illegal husi fronteira Terrestre, hahú husi loron 1 fulan-marsu to’o ohin meiu-dia hamutuk ema na’in 27.
Husi kazu foun iha leten, nain 6 iha munisipiu Dili,ho detalla tir mai:
Kazu pozitivu nain 3, husi Aldeia 05, Suku Fatuhada, Postu Administrativu Dom Aleixo. Pozitivu hirak ne’e kontaktu-besik (hela uma-laran ida), ho kazu husi cluster ne’ebé anunsia horseik.
Kazu pozitivu 1, husi Aldeia São Miguel, Suku Comoro, Postu Administrativu Dom Aleixo, positivu ne’’e kontaktu besik ho ho kazu cluster Aldeia 05, Suku Fatuhada.
Kazu ida ne’e professional saúde iha iha HNGV, unidade hemodiálize, nia servisu hamutuk ho professional saúde ne’ebé anunsia ona horseik katak positivu.
Kazu pozitivu 2, husi Aldeia Avansa, Suku Bairro-Pite, Postu Administrativu Dom Aleixo, Positivu rua ne’e kontaktu- besik ho kazu positivu iha cluster hanesan ne’ebé anunsia horseik.
Ho nune’e, kazu detetadu ka pozitivu iha Munisipiu Dili husi loron 7 to’o loron 17 fulan-marsu hamutuk 83.
Ho baze ba informasaun foun ne’ebé ekipa konjunta saúde nian rekolla foku ba cluster kazu postivu 83 iha Dili fahe ba cluster 23, namkari iha instituisaun 3, eventu 1, suku 7, fatin kuarentena 1,iha postu administrativu 2.
Husi kazu konfirmadu na’in 8 ne’e, nain ida husi munisipiu Baucau, Kazu konfirmadu foun na’in 1 ne’e, ba husi Dili iha loron 8 fulan marsu, hanesan estudante UNTL ne’ebé hela iha Aldeia Moris-Foun, Suku Comoro, Postu Administrativu Dom Aleixo.
Nune’e kazu konfirmadu iha munisipiu Baucau hamutuk na’in 7 ne’ebé namkari iha cluster 2.
Entretantu kazu foun na’in 1 husi RAEOA, kazu konfirmadu ne’e ema estranjeiru ne’ebé tama ho vistu servisu, auto-kuarentena durante besik semana 2, hafoin halo teste hetan rezultadu positivu.
Nune’e kazu positivu iha RAEOA hamutuk na’in 5 sura husi hahú pandemia iha tinan 2020.
Dadus jeral ba loron ohin, kazu foun na’in 8, rekuperadu na’in 5 no atual baixa hamutuk na’in 107.
Pandemia Covid-19 ne’e hamate ona ema na’in 2.661.919 iha mundu. Kazu infesaun hamutuk ema millaun 122,7, ne’ebé informa husi agência francesa AFP.
Coronavirus ne’e transmite hahú deteta iha tinan ikus 2019, iha Wuhan, sidade Xina.
Jornalista: Saturnina da Costa
Editor: Jose Sarito Amaral
