“Maneiru Governu nian atu influénsia povu sira bele partisipa iha vassinasaun ida ne’e, ita konselleiru boot ida ne’ebé internasionál, ita rekoñsidu mak Organizasaun Mundiál Saúde (OMS), enkuantu OMS seidauk hateten vassina ne’e la di’ak ita sei nafatin avansa ba AstraZeneca,”informa Xefe Governu ne’e ba jornalista sira, hafoin enkontru regular ho Presidente Repúblika, iha Palasiu Prezidensiál, Bairu-Pite Dili, Kuarta (17/03).

Xefe Governu ne’e informa, vasinasaun ne’e komesa la’o ona iha nasaun balun, nasaun Timor-Leste seidauk. Tanba ne’e, Ministériu Saúde hala’o ona kampaña sensibilizasaun, bainhira aimoruk vassinasaun to’o Timor, programa ne'e ne'e bele lao ona.

Tuir nia katak, la fasil atu hetan vassinasaun, tanba hadau malu maka’as lo’os iha mundu, hanesan mós Timor iha ne’e hadau malu foos.

Antes ne’e, Primeiru Ministru Taur Matan Ruak konvoka enkontru ho reprezentante OMS iha TL, Arvind Mathura hodi ko’alia kona-ba tipu vassina ne’ebé di’ak ba TL hodi prevene Covid-19.

“Ha’u reuniaun ho Primeiru Ministru hodi ko’alia objetivu rua hanesan planu introdusaun vassina Covid-19 iha Timor-Leste no deside tipu vassina, nune’e mós ko’alia kona-ba oinsá haforsa planu no estratéjia hasoru Covid-19 iha Timor-Leste. Organizasaun Mundiál Saúde (OMS) nia rekomendasaun to’o agora vassina tipu AstraZeneca,”reprezentante OMS informa iha Palasiu Governu.

Organizasaun Mundiál Saúde (OMS), sesta (12/3/2021) liu husi AFP, deklara katak, laiha rajaun atu hapara uza vassinaCovid-19 Astrazeneca. OMS hatoo pozisaun hafoin nasaun balun deside suspende halo lansamentu ba vassina ne’e, tanba deskonfia aimoruk ne'e hamosu koagulasaun raan (pembekuan darah), ho signifika halo raan initipidu iha ulun, hirus matan no area sensitivu iha isin lolon bele provoka struk, tensaun no seluk tan.

Entretantu nasaun Amerika mak hetan risku boot husi moras Covod-19 maibé fahe ona millaun 100 doze ba nia populasaun sira

OMS hatete,komite konselleiru vassinasaun hala’o ona investigasaun ba dadus ne’ebé tama, reafirma katak laiha relasaun entre utilizasaun vaksina Covid-19 AstraZeneca ho koagulasaun raan, tanba laiha indikasaun.
Relasiona ho preokupasaun husi nasaun balun ne’e, sosiedade iha Timor-Leste mós duvida ba programa vassinasaun kombate Covid-19 ne’e.

Tanba ne’e públiku balun sujere ba Governu atu sosa rasik aimoruk vassinasaun ho tipu ne’ebé la sai polemika. Husu mós ba Governu atu tetu molok foti desizaun antes submete ba programa vassinasaun AstraZeneca ne'e.

Jornalista: Saturnina da Costa

Editor: Jose Sarito Amaral