Tuir informasaun ne’ebé INDEPENDENTE asesu husi fonte kredivel hatete, daudauk ne’e INFPM hasoru hela problema boot kona-ba stock ba aimoruk.
Daudauk ne’e, fonte ne’e hatutan, iha armajen INFPM amoxicillin 500mg de’it mós laiha ona.
“Iha armajen sentral no rejional agora ne’e konsumaveis mak barak, ba aimoruk ne’e kuaze 65 porsentu mak laiha,” dehan fonte ne’e, Tersa (02/04).
Iha pedidu barak husi ospital no fasilidade saude sira, liu-liu ba aimoruk, maibé INFPM labele responde.
Tuir pedidu balun ne’ebé INDEPENDENTE asesu, husu atu INFPM distribui ona aimoruk esensial sira atu bele responde ba nesesidade tratamentu ba pasiente sira.
Aimoruk esensial sira ne’ebé husu mak hanesan: Sutura 0/1/2/3, Giving set Adulto, Amox tab, Ibuprofen tab, Captropil tab, Metro tab, Aluminium tab, Tranexamic inj, Hydro inj, Diclo inj, Genta inj, Dextrose 10%, Meropenem inj, Phenobarbital inj, Phentoin inj, Vit. K adultu no pediatric inj, Vit. K tab, Buscopan tab. Griseofulvin tab, Azithromycin tab, Cefixime tab, Gloves Medium, Syringe 5 ml, no Syringe 10 ml.
“Ida ne’e item balun de’it, seluk mós sei iha. Agora stock out ne’e sa’e maka’as,” dehan fonte ne’e.
Stock out iha SSM Ainaro
Servisu Saúde Munisipiu (SSM) Ainaro daudauk ne’e hasoru hela mós problema stock out ba aimoruk item 24.
Diretór SSM Ainaro, Benedito Mendonça hatete, aimoruk item 24 ne’ebé stock out kompostu husi aimoruk esensial, nesesariu no vital.
“Ami halo ona pedidu ba Institutu Nasional Farmasia no Produtu Mediku maibe to’o agora seidauk distribui aimoruk mai iha saude munisipiu Ainaru,” dehan nia via telefone, Kinta (04/04).
Sali-Magu hatama aimoruk item 20
Prezidente Ekipa Verifikasaun, Ministériu Saude, Alipio da Costa informa, iha iha 28 Marsu no 2 Abril ne’e, kompania Sali-Magu Unipesoal, Lda. hatama ona aimoruk item 20 ba INFPM.
Iha 28 Marsu, Sali-Magu hatama uluk aimoruk item 10 mak hanesan; Mannitol, Chloramphenicol, Rantidine hrydroclhoride, Vitamin K1 Unquoted 2022, Tobramycin+Dexamethasone/tobroson Espesialista 2023, Dextrose 5%+1/2 sodium chloride infusion, Dextrose 5%+1/4 sodium chloride infusion, Goserelin injeksi, Lidocaine gel, no Thiamin Injeksi.
Iha 2 Abril, hatama tan item 10 mak hanesan; Digoxin, Vitamin B1; thiamine, Abroxol tablet, Ardium Coated tabet, Bisphosphonate (Alendronic)/ALOVELL, Lidocaine gel/Xylocaine, Ofloxacin, Enalapril extended-Release/TENACE, Candesatran no Propafenona/RYTMONORM.
“Ita simu tan informasaun katak sira (Sali-Magu) sei hatama tan item 9 mai iha INFPM,” informa Alipio ba Jornalista Jornal INDEPENDENTE, Kinta (04/04).
Bainhira husu kona-ba aimoruk stock out iha INFPM, Prezidente Ekipa Verifikasaun ne’e hatete, nia parte labele fó komentariu ba kestaun ne’e.
Iha parte seluk, Diretór Kompañia Sali-Magu, Sanção Gomes afirma, nia parte hatama ona produtu mediku item 20 ba INFPM.
“Ita sei hatama tan item 250 iha fulan ida ne’e nia laran no fulan oin mai, maibé iha fulan ida ne’e ita sei hatama uluk item 9,” dehan Sanção via WhatsApp, Kinta (04/04).
