Tuir komunikadu ne’ebé Online INDEPENDENTE asesu iha pajina Prezidente Republika, haktuir, Amélia Soares, inan husi difisiensia Elisabeth Soares de Oliveira, agradese ba tulun ne’ebé oferese husi Prezidénsia Repúblika no mós kadeira roda.

“Nu’udár inan, ha’u sente haksolok tebes no obrigadu tambá Prezidente Repúblika Horta bele oferese kadeira roda mai ha’u nia oan feto Elizabet Soares de Oliveira ne’ebé oras ne’e tinan 30 ona. Antes ne’e, ami sempre aprezenta ba entidade balun kona-ba konsidasaun moris ne’e, liu-liu kadeira roda ne’ebé at, maibé la iha ida mak tau matan. Ami nia orasaun nafatin ho ita (Prezidente Repúblika),” agradese Amélia.

Amélia haktuir katak, oras ne’e dadaun sira hela iha Aldeia Usu Bemasu, Suku Beloi no sira la iha kbi’It atu sosa kadeira roda, hodi difikulta asesu Elisabeth Soares hodi asesu ba servisu saúde.

Além de ne’e, Ekipa Gabinete Sosiedade Sivíl no Apoiu Sosiál (SSAS) husi Prezidénsia Repúblika mós apoia nesesidade bázika no material disportiva ba iha Aldeia Iliana Suku Bikeli no Beloi.

Reprezentante benefisiáriu husi suku Bikeli no Beloi, nu’udár no Xefe Juventude, Pastór Andre Soares mós agradese ba Prezidénsia Republika ne’ebé tulun ona komunidade suku Bikeli.

“Reprezenta povu no juventude, ha’u fó obrigadu ba Prezidente Repúblika, hadomi tebes povu doben, ami nia apoiu orasaun nafatin Nia to’o nia ukun remata. Ami agradese tanba bele apoiu ami. Husu mos atu hare infrastutura bázika hanesan be moos ba komunidade,” tenik Pastór Andre Soares.

Entretantu, komunidade sira mós husu atu kontinua apoiu atividade juventude hodi kontribui ba dezenvolvimentu nasional.