Tuir informasaun ne’ebé jornalista sira hetan husi fonte iha Aeroportu Internasionál Prezidente Nicolau Lobato katak, PR Horta dezloka ba Darwin-Austrália ho Airnorth.
Fonte ne’e hatete, aviaun Airnort ne’ebé tula PR Horta to’o iha Dili iha tuku 11:00 oras Timor Leste no semo fali ba Darwin iha tuku 12:06 OTL.
“Prezidente Repúblika José Ramos Horta ba tiha ona, ohin jam 12 liu ne’e,” informa fonte ne’e iha Aeroportu Komor, Kuarta (14/06).
Tuir planu, hafoin halo ezame mediku iha ospital ida iha Darwin, PR Horta sei fila hikas mai Timor Leste iha Sesta ka Sabadu semana ne’e.
“Maibé depende ba diagnostika husi médiku sira,” fonte ne’e hatutan.
Molok ne’e, tuir informasaun ne’ebé jornal INDEPENDENTE hetan, Prezidente Repúblika, José Ramos Horta, iha 12 Juñu ne’e kansela hotu enkontru ne’ebé ajenda tiha ona. Iha informasaun katak Xefe Estadu sofre moras no sei dezloka ba rai li’ur hodi halo tratamentu saúde.
Tuir ajenda husi palasiu prezidensia, iha Segunda (12/06), parte dader nian, Prezidente Repúblika, José Ramos Horta, realiza enkontru ho Kompañia YieldPlay Energy Lizu, Lda. iha Palásiu Prezidensiál, iha tuku 09:00, kontinua ho enkontru ho Deputy Head of Mission at the Emb. of the UAE to the Republic of Indonesia, Shaima Salem Alhebis, iha tuku 10:00.
Iha parte loraik, PR Horta sei partisipa iha ‘The 125th Celebration of Philippines Independence’, iha City 8, Manleuana, iha tuku 18:00.
Maibé, ajenda hirak ne’e derrepente kansela.
Iha Tersa (13/06), husi parte palasiu prezidensia informa katak laiha ajenda enkontru PR Horta iha loron ne’e.
Parte palasiu mós informa tan katak, iha Kuarta (14/06), ajenda PR Horta iha 14 Juñu 2023 internal de’it.
“Atu informa nafatin ba kolega sira katak, ajenda Prezidente Repúblika, José Ramos-Horta, nian ba loron Kuarta-feira, 14 Juñu 2023, internal de'it, depois iha mudansa ba ajenda ruma mak sei atualiza fila-fali ba ita-boot sira,” informa parte media gabinete PR.
Relasiona ho kestaun ne’e, tuir fonte husi palasiu PR, kanselamentu ajenda ne’e relasiona ho kondisaun saúde PR Horta nian.
Tuir fonte ne’e, daudauk ne’e PR Horta sofre hela moras no tuir planu sei dezloka ba Australia hodi halo tratamentu saúde.
“Tuir planu PR Horta sei ba Australia halo tratamentu saúde,” dehan fonte ne’e, horseik.
Entretantu, bainhira jornalista Jornal INDEPENDENTE konfirma ho parte gabinete PR nian, informa katak PR la moras.
“PR Horta la moras ida, ohin ami hamutuk hela iha ninia rezidensia,” dehan pesoal husi gabinete PR.
