Uma Naroman ba Povu (UNP) kompostu husi UNP regular faze daruak unidade 9 no UNP plus A unidade 9 inklui uma ba Pesoal Saúde ida (1).
Vise-Ministru Administrasaun Estatal, Lino de Jesus Tozerão hatete, iha nia diskursu hatete, oitavu Governu nia mandatu besik remata ona maibé sira nafatin hala'o programa ne'ebé sei bele realiza no ba hirak ne'ebé labele ona realiza, husik Governu tuir mai mak hala'o.
"Governu tenki hala'o nafatin servisu ne'ebé iha, tanba ita hotu hatene katak seidauk iha legalidade fundamental ida ne'ebé mak hatete iha ne'ebá katak ita adopta semi-prezidensial, tanba ne'e bainhira Parlamentu seidauk fó tomada de pose Oitavu Governu sei ezisti nafatin," dehan Vise-MAE iya Suku Sabuli, Segunda (12/06).
Ho nune'e, Vise-MAE husu ba Governu Foun atu kontinua Nafatin Programa sira ne'e, atu labele sobu, maibé hametin, habelar no halo kontinuasaun nafatin.
"Ha'u hatete programa ne'e fó benifisiu boot ba ema kbiit laek sira, tanba ne'e presiza halo kontinuasaun," Vise hatete.
Iha fatin hanesan, Administrador PA. Metinaro Julio Norberto hateten, Uma Naroman ba Povu ne'ebé konstrui iha Metinaru hamutuk 55 ba benifisiariu sira no 46 mak halo hotu ona.
"UNP ba benifisiariu sira hamutuk 55, 46 mak hotu ona no sia (9) seluk mak ita halo ona aprovasaun hein atu halo implementasaun," dehan Administrador.
Ho nunue'e, Administrador PA. Metinaru lori komunidade tomak nia naran hato'o agradese ba Oitavu Governu liliu Ministériu Administrasaun Estatal no Diresaun PNDS ne'ebé fó ona kontribuisaun makaas no servisu ba iha populasaun Metinaru.
