Diretór Relasaun Externa no Komunikasaun Anacleto Caitano hatete, durante semana ida, hahú husi 06 to'o 12 fulan-Juñu APC, komunidade nia uma hamutuk 15 mak hetan estragus iha munisipiu lima (5) hanesan, Aileu, Bobonaro, Lautem, Vikeke, Baukau no Rejiaun Administrativa Espesial Oekussi Ambeno (RAEOA).
"Dezastre ne'ebé akontese iha tipu tolu mak, rai-halai, anin-boot no ahi-han uma, husi dezastre ne'e maioria ahi-han uma tanba hetan sirkuit husi eletrisidade,” dehan nia, iha Salaun APC Kaikoli, segunda (12/06).
Ho akontesimentu dezastre naturais ne’e, APC husu ba komunidade sira atu nafatin atensaun.
Nia esplika, iha Minisiupiu Aileu Postu Adiministrativu Lequidoe, Suku Asubilitoho ahi-han komunidade nia uma ida (1) no iha Bobonaru anin boot estraga komunidade nia uma ida (1).
Nia dehan, seluk iha Postu Baukau Vila, ahi-han komunidade nia uma ida (1) no anin-boot estraga estraga uma ida (1). Enkuantu, iha Munisipiu Vikeke, Postu Vikeke Villa ahi-han uma ida (1) no Lakluta ahi-han uma ida (1).
Nune'e mós, iha Rejiaun Administrativa Espesial Oekussi Ambeno (RAEOA), Sub-Rejiaun Pante Makasar, ahin-han komunidade nia uma haat (4) no anin boot sobu uma ida (1), iha Pasabe ahi-uma ida (1) no iha Netibe ahi-han uma ida (1) no mós akontese rai halai estragus uma ida.
Entertantu, iha Munispiu Lautem Lafaek tata labarik ida ho naran Alfredo Pinto da Costa, tinan 15 to'o lakon vida.
Diretor hatete, vítima dezastre naturais hamutuk uma-kain 15 ne'ebé nia uma estragus husi dezastre naturais ekipa APC halo ona apoiu emerjensia hanesan food Item no laos Food Item.
Enkuantu, dezastre naturais ne'ebé akontese iha fulan-Janeiru to'o Juñu hamutuk 1.170 uma mak hetan estragus no kategori atu hetan apoiu rekoperasaun no ema na'in-19 mak lakon vida.
