DILI: Prezidente Republika Jose Ramos Horta apela ba kuadru Partidu Demokratiku atu prepara-an truka jerasaun tuan.

"Iha esperiénsia parlamentár, iha esperiénsia governasaun, iha esperiénsia akadémika, emprezarial, esperiénsia internasionál, ne'e duni prepara aan didi'ak tinan 5 mai ne'e, prepara aan liután, tanba tinan 4 mai ne'e, eleisaun foun ba Prezidente-da-Repúblika, ita labele konta ona tinan 4, tanba ita to'o ona Janeiru ita bele hatete, tinan 3 ho balun. Mandatu tinan 4 tan, maibé prosesu prepara Prezidente foun ne'e tinan 3 ho balun," hatene Xefe Estadu iha komunikadu ne'ebé Online INDEPENDENTE sita.

Prezidente Repúblika, José Ramos-Horta, afirma tempu la’o lalais, tanba ne’e presiza prepara-an, tanba sei entrega responsabilidade ba jerasaun foun ne’ebe hamahan-an iha PD no mos partidu seluk.

Alende ne'e, Xefe Estadu mós husu partidu CNRT ho PD ne'ebé sei forma governu da-sia, atu labele implementa polítika ódiu, vingansa no persegisaun no hasai funsionáriu sira ne'ebé iha ona esperiénsia barak servisu iha instituisaun estadu.

Entretantu, Partidu Demokrátiku moris iha loron 10 fulan Juñu 2001, bainhira Timor-Leste hahú ukun aan.