Asesor Prinsipal sai husi Palasiu, PR Horta: “Boa Viajen ba Imi” Featured

By Cristina Ximenes Juñu 10, 2023 249
Prezidente Repúblika, José Ramos Horta. Foto:Dok. Prezidente Repúblika, José Ramos Horta. Foto:Dok.

DILI: Prezidente Repúblika, José Ramos Horta, fó boa viajen ba asesor prinsipal palasiu prezidensia nian ne’ebé tuir planu sei rezigna an hodi ba envolve an iha estrutura governu dasia.

Tuir PR Horta maske asesor prinsipal barak mak sai, maibé nia sei la halo nomeiasaun ba asesor foun tanba iha palasiu prezidensia iha asesor barak.

"Ha'u sei la halo nomeasaun foun ba asesór foun tanba asesór iha Prezidensia Repúblika lubuk ida loos, 50% bele sai ha'u la presiza hatama tan. Asesór de'it iha Palasiu Prezidensiál lubuk ida loos, ne'eduni sira hakat ba governu ‘obrigadu tan imi ba, boa viajen iha dalan husi Palásiu Prezidensiál Aitarak Laran ba to'o Palasiu Governu, boa viajen ba imi. Imi presiza angguna ruma tula imi lalais ba’," dehan PR Horta ba jornalista sira hafoin entrega nesésidade bázika ba komunidade vulneravel iha Suku Maliboro, Postu Administrativu Dom Aleixo, Munisipiu Dili, Kinta (08/06).

Xefe Estadu ne’e hatutan, iha mós funsionariu kontratadu palasiu PR nian ne’ebé sira-nia kontratu sei remata iha 1 Jullu ne’e.

“Funsionáriu balun mós sei remata kontratu ne'e loos duni, 1 Jullu remata kontratu, ne'e lá'os tanba Fretilin ka la'e, ne'e mesmu CNRT, PD, sira 1 Jullu remata, depois atu halo fila fali kontratu foun tenke tuir kritériu,” dehan Horta.

Ba kriteria, nia hatutan, dahuluk Horta hakarak asesór ka sira servisu asesór idaidak halo relatóriu servisu desde loron dahuluk tama servisu hodi justifika nia kontratu, no se servisu ne’ebé halo ne’e ezije lisensiatura, Horta hakarak haree fotokopia diplóma lisensiatura.

“Se servisu iha protokollu tenke ko'alia lian Ingles, tanba ne'e la ba halo protokollu iha Aileu ne'eba, Mambae ka Baikenu, baibain protokollu ko'alia ne'e lian Ingles, liu-liu bainhira Timor tama ASEAN entaun malae sira mai husi li'ur, ita-nia protokollu ba simu malae sira iha Aeroportu ne'e ko'alia lian materna ba ema, tanba ne'e la serve ba diplomásia internasionál,” dehan Horta.

Molok ne’e, Tuir informasaun husi fonte kredibel, asesor prinsipal lubuk ida iha palasiu prezidensia mak sei rezigna an bainhira CNRT forma ona governu.

“Asesor prinsipal barak mak sei sai, tanba sira mós tama iha estrutura partidu CNRT nian,” dehan fonte ne’e ba jornalista jornal INDEPENDENTE, foin lalais.

Nia afirma, asesor hirak ne’e sei rezigna an tanba balun hetan konfiansa atu tuur iha estrutura governu no balun iha instituisaun estadu sira seluk.

“Ita bele temi naran balun hanesan Tomas do Rosario Cabral, Abilio Caetano, Dionisio Babo, Ivo Valente, João Gonçalves, Dulce de Jesus, Helder Lopes, Alexandrino Araujo, Cristiano da Costa, sira sei sai husi palasiu prezidensia,” fonte ne’e informa.

Enkuantu ba kargu ne’ebé membru CNRT hirak ne’e asume iha palasiu PR, fonte ne’e informa, Tomas nu’udar asesor ba asuntu politika, Babo asesor ba asuntu relasaun internasional, Dulce Asesor ba asuntu edukasaun, Helder asesór ba asuntu finansas, Ivo asesór ba asuntu juridiku, Alexanderino asesór ba asuntu fraternidade umana, João Gonçalves asesor ba asuntu ekonomia.

Aleinde asesor hirak ne’e, nia dehan, iha mós membru CNRT balun tan mak sei sai husi palasiu PR.

“Bainhira governu forma ona ne’e barak mak sei sai husi palasiu,” nia hatutan.

Fonte ne’e dehan tan, Prezidente Repúblika, José Ramos Horta, mós sei halo mudansa, liu-liu ba ema CNRT ne’ebé durante ne’e ‘invade’ palasiu PR.

“Kuaze na’in 100 resin mak nia kontratu mate iha fulan ne’e no la renova ona. Husi palasiu hatete ba sira atu deskansa lai. PR Horta sei halo avaliasaun, se haree katak iha nesesidade, karik sei bolu fali balun,” nia dehan.

Entretantu, iha tinan kotuk, hafoin PR Horta simu pose, ninia eis ekipa susesu 300 resin mak tama iha lista atu servisu iha palasiu PR. Husi númeru ne’e balun konsege asina ona kontratu, enkuantu balun seidauk asina kontratu.

Tuir fonte seluk, númeru eis ekipa susesu ne’ebé kada partidu no movimentu aprezenta iha na’in 200 resin. Husi númeru ne’e, na’in 50 sai nu’udar asesor.

“Agora daudauk funsionariu públiku iha palasiu prezidente hamutuk na’in 200 no eis ekipa susesu na’in 200 resin mak tama lista atu mai servisu iha ne’e,” dehan fonte ne’e.

Bainhira ema hirak ne’e konsege asina duni kontratu, signifika númeru ema ne’ebé PR Horta lori ba hodi apoiu nia servisu iha palasiu PR sei boot liu kompara ho Prezidente Repúblika sesante.

Tuir informasaun, iha tempu Prezidente Repúblika, Francisco Guterres ‘Lú Olo’, ema ne’ebé tama iha kategoria ‘apontamentu politiku’ na’in 100 resin. Enkuantu iha tempu PR Taur Matan Ruak, apontamentu politiku iha na’in 30 resin.

Tuir ema ne’ebé iha koñesimentu ba kestaun ne’e hatete, PR Horta sente preokupa mós ho númeru ‘apontamentu politiku’ ne’ebé barak tebes.

Nia dehan, Horta hasai ona desizaun atu avalia lista husi ‘apontamentu politiku’ sira ne’e hodi hamenus númeru.

“Ida ne’e hanesan naha todan ida ba Prezidente, nia mós preokupa, ne’ebé sei iha desizaun balun relasiona ho kestaun ne’e,” dehan fonte ne’e.

Enkuantu, Prezidente Repúblika, José Ramos Horta, la nega katak iha eis ekipa susesu ne’ebé apoiu nia iha eleisaun prezidensial mak hakarak atu ba servisu iha palasiu Prezidente Repúblika. Husi sira ne’ebé tama, maioria mak Horta la koñese.

Horta dehan, pesoalmente nia koñese ekipa susesu husi partidu CNRT nian, sira servisu maka'as, liu-liu Xanana Gusmão no líder sira seluk CNRT nian.

"Ekipa susesu 300 resin ne'ebé servisu iha Palasiu Prezidensiál ne'e ha'u la hatene, balun ha'u koñese karik, maiória nem ha'u koñese," dehan Horta iha 24 Agostu 2022.

Rate this item
(0 votes)
Last modified on Kuarta, 14 Juñu 2023 16:56

Independente Digital TV