Diretór Ezekutivu Fundasaun Mahein Nelson Belo hatete, sidadaun ne'ebé lori bala musan ualo (8) ne'e ba iha estranjeiru hafoin mai fali, tuir pontu devista FM nian presiza halo investigasaun hodi bele hatene kle’an. "Primeiru investigasaun ida husi PNTL depois PNTL halo identifikasaun ba asuntu kriminal ne'e nunue’e mos bele analiza tok iha ka lae joven ida tama sai lori kilat ne’e, iha nasaun ida ne'ebé bele ameasa seguransa nasionál," dehan Diretór Ezekutivu iha nia knar fatin Bairus dos Grillos, Tersa (14/01/25).

Ezekutivu ne’e dehan, sasan sira ne’ebé mak ilisitiu ne'ebé lei prevee ona hahu husi Konstitusiaun RDTL katak kilat ho kilat musan ne'e ba de'it instituisaun PNTL no F-FDTL no instituisaun ne'ebé lei fó dalan. Maibé ema sivil mak lori armas hirak ne’e konsidera viola lei, tanba ne'e sosiedade sivil sira rekomenda atu husu halo investigasaun ne'ebé kle’an. "Tanba ne’e mak ami husu atu halo investigasaun kle’an para bele hatene viola lei ne’e oinsa? depois ameasa ba seguransa nasional ne'e oinsa?," dehan Diretór Ezekutivu.

Iha sorin seluk, Diretór Ezekutivu HAK, Feliciano da C. Araujo hatete, relasiona ho asuntu ne’e, liga liu ba jestaun kontrolu, liuliu ba iha ajente sira ne'ebé servisu iha seguransa, presiza hare didiak material sira ne'ebé lori risku.

"Agora ita refere fali ba ajente seguransa balun nia oan lori bala musan 8 ne'ebé deteta husi ita nia imigrasaun ka sira ne'ebé servisu iha ALFANDEGA iha fronteira, ne'e hatudu katak ita nia jestaun kontrolu ne'ebé fraku tebe-tebes, depois ita bele hatete katak ne'e mós abuzu ona ba iha utilizasaun armas sira," dehan Diretor HAK.

Nia hatutan, ba ajente sira ne'ebé kaer seguransa no defeza, atu hatene katak sasan hirak ne’e, sasan kroat ne'ebé fó risku tebes ba sosiedade, se ema uza sasan ne’e la tuir dalan mak nia impaktu mak fó risku ba ema nia vida.

Nune’e, tuir espetativa HAK nian mak, parte investigasaun presiza hare no halo investiga didi’ak, tau atensaun no mós fó sansaun ba aktu ne'e.

"Se bele karik ami husu buat ida mak atu bele fó sansaun ba ida ne'e, klaru katak sira iha regulamentu sansaun ba disiplinar ninian, ha’u hanoin presiza atu hato'o se lae hanesan ne'e, ema toman ona halo bebeik, dala ruma mós utiliza bala musan ida ne’e la tuir ninia fatin no uza konforme nia hakarak," dehan Diretór Feliciano.

Ezekutivu HAK Hatutan tan katak, se bele hametin liu tan kontrolu ba iha material hirak ne'e no ema ne'ebé la’ós nain ba material hirak ne’e labele utiliza.

Enkuantu, ba kazu lori bala musan tama sai fronteira, ne’ebé komete husi membru PNTL balun nian oan, sosiedade sivil rekomenda ba parte relevante, liliu komando PNTL atu labele autoriza nia membru sira lori armas ba uma no presiza mós komando nia kontrolu ba armas sira ne’ebé membru sira utiliza, nune’e evita risku ba komunidade no sosiedade.