Tuir informasaun ne'ebé INDEPENDENTE asesu, iha 12 Janeiru tuku 11 dader, autoridade iha fronteira deteta kilat musan ualu iha pasta ne’ebé joven na’in rua ho inisial GdSM (26) no OLSG (23) lori.
Deskonfia bala musan ne’e GdSM no OLSG lori sai husi Timor-Leste ba Indonezia iha 10 Janeiru no foin deteta bainhira sira tama hikas mai Timor-Leste iha 12 Janeiru.
Tuir informasaun, joven na’in rua ne’e nu’udar oan husi pesoal Polisia Nasionál Timor-Leste ho inisial RM. Nune’e deskonfia kilat musan ne’e RM nian ne’ebé nia oan mane na’in rua ne’e lori.
Deskonfiansa ne’e haforsa ho imajen balun ne’ebé deteta iha suspeitu GdSM nia telemovel ne’ebé hatudu suspeitu kaer hela kilat rakitan.
Hafoin identifika, autoridade sira halo kedan identifikasaun no intrega ba Departamentu Investigasaun Kriminál Nasionál, PNTL hodi kontinua halo prosesu investigasaun.
Ba kestaun ne’e, Komandante Unidade Patroillamentu Fronteira (UPF), Superintendente Assistente Polísia Euclides Belo rekoñese katak, bala musan ne’e pesoal polisia ida nian ne’ebé nia oan na’in rua lori tama ba Indonezia.
"Sasán ne'e membru Polísia Nasionál Timor-Leste ida nian, tanba nia oan na’in rua husi Timor ba Atambua iha loron 10 Janeiru foin lalais ne'e makina X-Ray la deteta, fila mai Timor-Leste mak foin deteta," dehan Euclides ba Jornalista jornál INDEPENDENTE via telefone, Domingu (12/01).
Bainhira deteta, nia hatutan, aturidade asegura kedas no komunika ba DIKN hodi ba foti no submete ba prosesu investigasaun.
"Kazu ne'e agora daudaun sei iha prosesu investigasaun, tanba ita-nia ekipa Konjunta kompostu husi Alfandega, Migrasaun UPF no SNI entrega ona ba Departamentu Investigasaun Kriminál Nasionál iha PNTL atu halo prosesu investigasaun depois mak ita hatene klaru," katak nia.
