Ministru Transporte no Komunikasaun, Minguel Marques Goncalves Manetelo hatete, antes tinan kotuk, Diresaun Nasionál Transporte Terrestre (DNTT) hasai ona karta sirkulasaun ida bá Taxi sira-ne'ebé kondisaun ladun diak, husu tenke para, labele halai tan.

"Iha tinan kotuk, bain-hira DNTT hamutuk ho polisia tranzito halo Inspesaun iha dalan prenda kareta Taxi barak, ne'ebé mak laiha kondisoes tiha ona, kuaze tinan barak nia laran sira la halo Inspesaun, mais sira kontinua opera,” Dehan Ministru bá jornalista sira, iha Otel Novu-Turismu, Sesta (10/11).

Nia dehan, antes né'e kareta Taxi barak kondisaun ladiak no lori hotu bá iha DNTT fo karta bá sira no fó tan tempu bá sira, atu halai iha Dili laran to'o iha 2025.

Nune’e mós DNTT hasai karta hapara provizoriu Taxi sira labele tula tan pasajeiru, maibé poltika ida ne'e hetan kontra to'o lori keixa ba iha Parlamentu Nasionál.

"Tan ne'e, ha'u hatete bá sira, bá ita-nia rai-nia diak, mai ita servisu hamutuk, kareta laiha kondisaun di'ak, tenke para. Ita hatene kareta Taxi balu odamatan mos taka ladiak, balun ida odamatan kotuk tula sasan kesi ho tali de'it. Kuandu sira kontinua halai, signifika sira la bá halo Inspesaun, tanba Inspesaun iha DNTT ne'e la liu, halo nusa mak Taxi balun odamatan ladiak, bele halai,” Nia afirma.

Nia  afirma, DNTT fó tempu hela bá sira, tanba komprende kondisaun buka moris ho Taxi, mais iha tinan 2025 to'o sai fulan sira labele opera ona iha Dili laran.

Mikrolete-Bus labele hakat liu Tarifa DNTT

Purtantu, Ministru né'e mos informa, kona-bá Transporte Publiku sira hanesan Mikrolete no Bus Diresaun Dili bá Munisipiu sira atu labele hakat liu Tarifa ne'ebé mak DNTT hasai ona.

Tanba, MTK liu-husi DNTT sei regulariza tarifa folin Mikrolete no Bus nian, bazeia bá preokupasaun husi pasajeiru sira durante ne'e ne'ebé bálun espalla iha media sosial, no balun hato'o keixa direita bá DNTT.

Maibé, atu regulariza ida ne'e dala-ruma tenke iha situasaun difisil, ema balun ka'er de'it mak mina nia folin sa'e, buat hotu-hotu ne'ebé la'o interligadu, orsida folin sa'e sira dehan Ro tula sasan mai né'e folin karun taxa a'as, mina karun.

“Ita iha tarifa ne'ebé mak DNTT hasai, ita koko atu sira labele hakat liu ida ne'e, ne'ebé kontinua DNTT halo akompanamentu, kuandu iha keixa ruma sira sempre koordena halo reuniaun ho kareta na'in sira, para atu haré presu sira ne'e, maibé dala-ruma sira fo razaun ita ko'alia mos ladiak,” Nia afirma.