Ministru Transporte no Komunikasaun, Minguel Marques Goncalves Manetelo, hateten, iha Dili iha terminal balun ezisti mak ida iha Bekora no ida iha Tasi-Tolu, maibe ida iha Tasi-tolu agora la uza, tanba akampanamentu kazerna F-FDTL ni’an.
Maibé terminál iha Tasi-tolu né'e, Ministru halo ona esforsu hodi ko'alia ho Ministru Defeza bá futuru F-FDTL sira muda tiha, tanba dadauk né'e sira kazerna foun, nune'e bá oin Governu sei reaabilita hikas terminal refere.
Nia dehan, hare ba kondisaun terminal la sufiente hodi akumula tranposte publiku ne'ebe mai husi Munisipiu sira, tanba ne'e bá oin maka Governu sei hari'i terminal rejional tolu iha Leste, Oeste no Sul iha Dili.
“Mais né'e terminal bá Dili laran ni’an, ida bá oin terminal rejional ida mak iha merkadu manleu nia kotuk, rai iha ne'eba uluk Ministru sesante Gil Alves, kuandu hola rai iha merkadu ne'e, nia fo kotuk né'e bá iha terminal no agora kareta balun para iha ne'eba, ida ne'e sei sai terminal rejional ida,” Dehan Ministru bá jornalista sira, iha Otel Novu-Turismu, Sesta (10/11).
Nia hatutan, Governu planu harii terminal rejional iha Merkadu manleu nia kotuk, hodi akumula tranposte publiku sira-ne'ebé mai husi parte Sul ni’an hanesan, husi Munisipiu Ainaru, Kovalima, Aileu no Manufahi.
"Iha parte leste nian, ha'u seidauk bá haré lai, mais sira temi hela iha Halidolar ni’an, ida ne'e terminal rejional nian. Iha parte loro-monu nian ha'u hakerek karta bá Ministru Justisa, Matebian Amando de Sa Benevidas, iha 2024 husu hela rai ida iha Tibar para bá hari terminal rejional husi loro-monu nian, para akomoda husi Ermera, Liquisa, Bobonaru no sira husi ne'ebe mai husi rai-liur hanesan Atambua ba Transporte Publiku bele para hotu iha né'eba, labele tama hotu mai Dili,” Nia afirma.
Nia subliña, razaun Governu tenke harii terminal rejional iha Dili, tanba haré bá numeru veikulus aumenta hanesan iha 2024 rejista kareta rihun 11 no Motorizada rihun 25.
“Ida-ne'e mak tinan-tinan hanesan, Dili ita bok-aan ladiak, tan né'e ita koko halo estudu viabilidade no planu Mestre transporte publiku ne'e para dezenvolve buat ida-ne'e ho hanoin tok bá oin,” katak nia.
Nia haktuir, kapital Dili iha mak terminal Bekora no Governu hahu ona halo reabilitasaun, maibé terminal né'e ki'ik, mikrolete sanulu tama nakonu tiha ona, satan bus sira.
“Ne'ebé aban-bainrua kuandu ita dezenvolve ona terminal rejional parte leste nian, bus sira mai lorosa'e ne'e iha ona Halidolar, la tama mai Dili ona, ema husi Dili atu Baukau, Viqueque, Lospalos, Manatutu sa'e kareta ki'ik para bá tun iha Halidolar sa'e fali bus iha ne'eba bá liu,” Nia koklui.
