Xefi Komisaun Organizadora, Armenia da C. Pereira, hatete, Objetivo husi atividade fashion show ne’e atu sosializa uniforme ka farda foun  kada diresaun sira nian, ba públiku hodi bele identifika pesoal sira nia servisu entre Mediku Espesialista, Mediku Jerál, Enfermeiro, Parteira, Tekniku Aliadus, Servisu Administrasaun, Seguransa no Pesoal Limpeza.

Xefi Komisaun Organizadora hatutan, kompetisaun ne'e atu hatudu oinsa pesoal saúde sira nia perfomence ida lolos bainhira  mai servisu no fó atendimentu ba pasiente sira tuir kodigu konduta no etika HNGV.

 Tanba tuir komisaun organizadora, durante ne’e pesoal saúde sira mós hatais farda latuir sira nia profisaun hodi atende pasiente sira.

“Ita haree durante ne’e, HNGV difikuldade iha farda halo ita nia pesoal saúde sira hatais farda la tuir ida-idak nia profisaun, tanba ida ne’e atividade ida ohin atu hatudu uniforme foun ba públiku hodi identifika pesoal saúde sira nia identidade lolos,” Dehan Xefi Komisaun Organizadora liu husi komunikadu ne’ebé Online INDEPEDENTE asesu liu husi Pájina Facebook HNGV, Sábadu ne’e (11/01/25).

Aleinde ne’e mós iha abertura kompetisaun fashion show ba uniforme foun ba pesoal servisu HNGV nian, Diretóra Ezekutiva  no Prezidente Konsellu Diretiva HNGV, Cecilia Barros Mendonça, hatete, atividade fashion show ne’e atu hatudu ba públiku no mós ba pesoal saúde sira relasiona ho uniforme foun ne’ebe eziste iha HNGV.

Nia afiram, uniforme ida ne’e hanesan identidade husi pesoal servisu ida-idak nian tanba pesoal servisu HNGV hamutuk 1.000 resin ho profisaun ne’ebé la hanesan.

Tanba ne’e, Diretora Ezekutiva  HNGV husu ba pesoal servisu sira atu utiliza farda tuir ida-idak nia profisaun, bainhira halo atendimentu ba pasiente sira iha HNGV.

Entretantu, marka prezensa iha atividade ne’e mak husi Konsellu Diretiva HNGV, Xefi Gabinete, Xefi Departamento, Xefi Unidade, Koordenador no funsionariu HNGV.