"Ha'u to'o agora seidauk rona dehan katak sira husi Fomentu I, Fomentu II no Moris Foun ne'ebé mak hetan ona markasaun númeru ne'ebé tau iha sira nia uma, sira nia konta bankaria iha ona, ne'e ha'u seidauk rona los,” dehan Xefe Suku Komoro Elegio José Merçal ba Jornalista INDEPEDENTE iha nia knar fatin Sede Suku Komoro, Sesta (10/01/25).
Nia dehan, haree ba iha Suku Komoro aldeia 12 Outubru, ne'ebé ekipa konjunta lidera husi Sekretaria Estadu asuntu Toponimia Organizasaun Urbana (SEATOU) hasai komunidade ona uma-kain 11. Sira ne’e liu tiha semana tolu osan tama kedas ba komunidade sira nia konta bankaria, maibé ba Fomentu II komunidade sira seidauk hetan indiminizasaun.
Tanba ne'e, bainhira Autoridade lokal rona ona katak, Governu fó sira nia direitu kona-bá indiminizasaun mak, hanesan autoridade sei enkoraja liutan vitima eviksaun hodi bele ba foti sira nia osan.
Entretantu, Xefe Suku hatutan, tuir informasaun ne'ebé autoridade lokal simu husi SEATOU katak komunidade sira ne’ebé hetan eviksaun, Governu garante sei hetan indiminizasaun.
Enkuantu, tuir informasaun ne'ebé Online INDEPENDENTE asesu iha pájina gabinete Primeiru Ministru, katak, governu rekolla ona komunidade uma kain 288 iha Fomentu II nia konta bankaria.
