Ne’e duni, membru Parlamentu Nasionál na’in 36 seluk la ativu ona iha servisu. Maski sira tuur de'it iha uma la halo servisu, maibé sira-nia saláriu kontinua la’o nafatin.

Haree ba situasaun ne’e, sosiedade sivíl sira husu kansela deputadu na’in 36 ne’e ninia saláriu, tanba la ativu iha servisu.

Peskizadór Asia Justice and Right (AJAR), Inocêncio de Jesus Xavier hatete, nu’udar servidór Estadu sira laiha ona kontribuisaun maibé kontinua hetan saláriu no perdiem ne’e konsidera injustisa sosiál.

“Sekretáriu Jerál PN bele hahú haree karik deputadu sira ne'ebé la tama ona komisaun permanente, husu atu kansela sira-nia saláriu”, tenik nia, iha servisu fatin, Faról, horisehik.

Tuir nia, situasaun ne’e la kontribui ba polítika poupansa. Tanba ne’e, husu polítiku na’in sira, liuliu ba partidu polítiku sira atu toma nota ona hodi haree halo revizaun ba lei sira ne’ebé la fó benefísiu ba Estadu no povu.

Nune’e, husu ba PN atu hahú halo polítika boa governasaun husi órgaun soberania sira, labele kolia de'it kona-ba governasaun di'ak sai hanesan kompromisu maibé la iha asaun.

Iha fatin hanesan, peskizadór Asosiasaun HAK, Sisto dos Santos hateten, Komisaun Permanente ne’ebé reprezenta PN hodi responde situasaun balun ne’e nesesita duni, maibé deputadu restu ne’ebé la tama Komisaun Permanente konsidera ilegál, sira-nia estatutu la loos.

Ne’e duni, kuandu sira-nia saláriu kontinua la’o ne’e hanesan krime, presiza tau ba kestaun ne’e. La haree ba osan de’it, maibé forma ida kona-ba abuzu podér ba utilizasaun propriedade Estadu nian.

Estadu kada fulan aprova osan ba ema ne’ebé halo nia empeñamentu hodi serve estadu ne’e di'ak, maibé aprova fali osan ba ema ne’ebé la kontribui formalmente ba funsionamentu estadu di'ak liu hapara.

Nia sujere temporariamente suspende saláriu ba deputadu 36 ne’ebé nia estatutu la klaru ne’e.

Alende ne’e, husu ba ministériu finansas atu publika saláriu mensál ba deputadu 36 ne’e, nune’e públiku bele hela ho klareza kona-ba alokasaun rekursu estadu nian.

Antes ne’e, Prezidente Parlamentu Nasionál, Aniceto Guterres deklara katak, Prezidente Repúblika disolve Parlamentu Nasionál funsionamentu kontinua la’o nafatin tanba iha Komisaun Permanente ho nia deputadu 29.

Alende ne’e, hanesan deputadu 36 seluk sei kontinua mai iha komisaun espesializada maski la ativu, maibé saláriu kontinua la’o tanba Konstituisaun artigu 100 aliña 2 fó dalan. Iha ne'ebá kolia kona-ba disolusaun Parlamentu Nasionál nian la hamate mandatu deputadu sira nian to’o parlamentu foun nian reuniaun dahuluk.

Observasaun diáriu ne’e nian durante semana ida nia laran, deputadu 36 seluk maioria mak la ativu ona iha PN. Balun dezloka ona iha uma no seluk fali dezloka ba munisípiu hodi halo preparasaun ba eleisaun antesipada.