Ministru Adjuntu Primeiru Ministru Asuntu Boa Governasaun, José Maria dos Reis hatete, viber eletrisidade iha Palásiu Governu mak keima. Ne’e duni, ahi mate no durante oras hirak nia laran servisu iha Palásiu Governu paradu.

“Konslet iha poster ida iha Palásiu Governu nian mak keima, maibé ohin sira ba hadi’a nune’e konslet tan entaun ahi mate hotu”, dehan nia, iha iha Faról, horisehik.

Nia dehan, hafoin akontesimentu ne’e, orienta kedas parte EDTL nian hodi haree viber ne’ebé keima ona troka foun, nune’e funsiona hikas servisu iha fatin ne’e.

Jornalista tenta konfirma ho tékniku EDTL ne’ebé monta fiu eletrisidade iha Palásiu Governu nian maibé lakohi fó komentáriu.

 Garante Kontajen Votu Ahi La Mate

Maski ikus-ikus ne’e mosu problema kona-ba ahi eletrisidade, maibé Governu garante nafatin atu labele akontese ahi mate iha tempu kontajen votu.

Ministru José Reis hatete, Governu apela ona ba tékniku EDTL sira atu halo manutensaun no halo operasaun ba poster eletrisidade travo bainhira kontajen votu iha eleisaun antesipada eletrisidade labele falla.

“Iha eleisaun antesipada ne’e laiha problema ho ahi eletrisidade tanba sentrál elétriku rua ne’e funsiona hela”, tenik nia.

Manutensaun kontinua la'o di'ak, nune’e, kombustivel ba sentrál elétriku nian laiha problema.